Шинэчлэлийн Засгийн газраас хэрэгжүүлж буй төрийн үйлчилгээг иргэдэд хүнд сурталгүй, хурдан шуурхай, хүртээмжтэй хүргэх ажлын хүрээнд “Төрийн түгжрэлгүй үйлчилгээ” зорилтын дор “Төрийн үйлчилгээний цахим машин” буюу “ТҮЦ МАШИН”-ыг нэвтрүүлэн ашиглалтад оруулсан.

Тэгвэл Монгол Улсын Ерөнхий сайд Н.Алтанхуяг өнөөдөр энэ ажлыг гүйцэтгэсэн инженерүүдийг хүлээн авч уулзан талархал илэрхийлж, тус газрын Мэдээллийн технологийн газрын дарга Б.Билэгдэмбэрэл, програм зохиогч Д.Батбаяр, програм зохиогч П.Нэргүй нарт болон бусад байгууллагаас оролцож ажилласан залуучуудад “ТҮЦ машины талархал”-ыг гардууллаа. ТҮЦ машиныг ашиглалтад оруулахад гүйцэтгэгч байгууллагаас гадна Үндэсний Дата төв, Улсын бүртгэлийн Ерөнхий газар, Кибер аюулгүй байдлын газар, Татварын Ерөнхий газар, Мэдээллийн технологи, шуудан, харилцаа холбооны газар, Скайтел компани гэсэн долоон байгууллагын 21 инженер техникийн ажилтнууд ажилласан. Улсын хэмжээнд ажиллаж буй 45 “Төрийн үйлчилгээний цахим машин” буюу “ТҮЦ машин”-аар дамжуулан тус газраас иргэний бүртгэлийн буюу төрсний бүртгэлийн, иргэний үнэмлэхийн, оршин суугаа хаягийн, гэрлэлт цуцлалтын бүртгэлийн, гэрлэлт бүртгэлгүй тухай 6 төрлийн лавлагааг олгож байгаа бол 10 дугаар сараас эхлэн эд хөрөнгөтэй эсэх тухай лавлагааг олгож байна.