Улсын бүртгэлийн ерөнхий газраас үл хөдлөх эд хөрөнгийн улсын бүртгэлийн үйлчилгээг иргэдэд ойртуулах, хүртээмжтэй, шуурхай хүргэх зорилгоор УБЕГ-ын даргын 2013 оны 1447 дугаар тушаалаар “нийслэлийн Багануур, Баянгол, Баянзүрх, Сонгинохайрхан, Чингэлтэй, Хан-Уул дүүрэгт Эд хөрөнгө өмчлөх эрхийн улсын бүртгэлийн гэрчилгээнд улсын бүртгэгч дангаар гарын үсэг зурж, баталгаажуулах эрхийг олгож, иргэдэд хүргэх үйлчилгээний шат дамжлагыг буурууллаа.

Энэхүү зохицуулалтыг бий болгосноор өмнө нь тухайн үл хөдлөх эд хөрөнгийн гэрчилгээнд Улсын ерөнхий бүртгэгч гарын үсэг зурж, баталгаажуулдаг байсан бол одоо улсын бүртгэгч гарын үсэг зурж, баталгаажуулах юм. Ингэснээр ажлын 3 хоногт гардаг байсан эд хөрөнгийн улсын бүртгэлийн гэрчилгээний яаралтай үйлчилгээ ажлын 8 цагт, энгийн үйлчилгээ ажлын 5 хоногт гарч байхаар боллоо. Тус газар нь Эд хөрөнгийн эрхийн улсын бүртгэлийн үйлчилгээг нийслэлд нэг цэгээс үзүүлдэг байсныг 2012-2013 онд өөрчилж нийслэлийн Багануур, Баянгол, Баянзүрх, Сонгинохайрхан, Чингэлтэй, Хан-Уул дүүргийн Эд хөрөнгийн эрхийн бүртгэлийн үйлчилгээг дээрх дүүргүүдийн Засаг даргын Тамгын газрын байранд шилжүүлэн үйлчилгээг үзүүлээд багагүй хугацаа өнгөрч байгаа билээ. Тэгвэл уг үйлчилгээ зөвхөн эдгээр дүүргүүдэд хамааралтай бөгөөд УБЕГ-ын үйлчилгээний 1-р байранд үйл ажиллагаа явуулж буй Сүхбаатар, Багахангай, Налайх дүүргийн Эд хөрөнгийн эрхийн бүртгэлийн үйл ажиллагаа, үйлчилгээнд хамаарахгүй юм.