Жил бүрийн 11 дүгээр сарын 23-нд “Улсын бүртгэлийн ажилтны өдөр”-ийг тэмдэглэн өнгөрүүлдэг уламжлалтай бөгөөд эдүгээ 4 дэх жилтэйгээ золгож байна.

Тэгвэл энэхүү тэмдэглэлт өдрийн Баярын хурал өнөөдөр боллоо. Улсын бүртгэлийн ерөнхий газрын дарга Ц.Пүрэвдорж үг хэлж, баярын хурлын үйл ажиллагааг нээсэн бөгөөд тус салбарт олон жил идэвхи зүтгэл гарган, үр бүтээлтэй ажиллаж яваа Эд хөрөнгийн эрхийн бүртгэлийн газрын ахлах байцаагч Ө.Өнөрлхам, Нийслэлийн Улсын бүртгэлийн газрын архивын хэлтсийн ахлах архивч Д.Жаргалсүрэн нарыг “Хууль зүйн албаны тэргүүний ажилтан” тэмдгээр шагнасан бол “Улсын бүртгэлийн тэргүүний ажилтан” тэмдгээр Иргэний бүртгэлийн газрын Иргэний бүртгэл, статистикийн хэлтсийн улсын бүртгэгч Ж.Батнасан, Төв аймгийн Улсын бүртгэлийн хэлтсийн Иргэний бүртгэлийн тасгийн дарга Ж.Адилбиш, Хэнтий аймгийн Улсын бүртгэлийн хэлтсийн улсын бүртгэгч Ч.Наранжаргал, Б.Сарантуяа, Бүртгэлийн хяналтын газрын улсын байцаагч Ч.Цагаанхүү нарыг шагналаа. Харин Яамны “Хүндэт жуух бичиг”-ээр Говь-Алтай аймгийн Улсын бүртгэлийн хэлтсийн Эд хөрөнгийн бүртгэлийн тасгийн улсын бүртгэгч Г.Чүлтэмжамц, улсын бүртгэгч Б.Амгалан, Төв аймгийн Улсын бүртгэлийн хэлтсийн улсын бүртгэгч С.Энхжаргал, Улсын бүртгэлийн төв архивын газрын Иргэний бүртгэлийн газрын ахлах архивч Ц.Тошлой, Сонгинохайрхан дүүргийн Улсын бүртгэлийн хэлтсийн бичиг хэрэг, нярав Б.Хорлоо, Архангай аймгийн Улсын бүртгэлийн хэлтсийн хяналтын улсын байцаагч Б.Мөнхзул, Увс аймгийн Улсын бүртгэлийн хэлтсийн улсын бүртгэгч Н.Дамдин-Очир, Хуулийн этгээдийн бүртгэлийн газрын улсын бүртгэгч Д.Лэхсо нар шагнагдлаа. Мөн зарим ажилтан албан хаагчийг байгууллагын “Хүндэт өргөмжлөл”, “Жуух бичиг”-ээр тус тус шагнаж урамшуулав. Улсын бүртгэлийн ажилтны тэмдэглэлт өдрийг угтаж тус газар олон арга хэмжээ авч хэрэгжүүлсэн бөгөөд анх удаа системийн хэмжээнд спортын аварга шалгаруулах тэмцээнийг амжилттай зохион байгуулж шилдгүүдээ тодруулсан юм. Мөн нийт албан хаагчдыг хууль эрх зүйн болоод тус газрын үйл ажиллагаатай холбоотой нэгдсэн мэдээллээр хангах зорилго бүхий “Улсын бүртгэл” улирал тутмын сэтгүүлийн Анхны дугаарыг гарган нийт албан хаагч нартаа өргөн барилаа. Түүнчлэн Нийслэлийн Улсын бүртгэлийн газраас нийслэл, дүүрэг, хороодын ажилтан албан хаагчийг хамруулсан урлагийн наадмыг зохион байгуулж шилдгүүдээ шалгаруулсан. Тэгвэл тус наадмаас шалгарсан шилдгүүд мэргэжлийн урлагийнхнаас дутхааргүйгээр баярын хурлын үеэр урлагийн тоглолтуудаараа мэндчилгээ дэвшүүлж, сонирхуулсан нь бидний баяр дээр баяр нэмсэн үйл явдал боллоо. Тус газрын хамт олон “Улсын бүртгэлийн ажилтны өдөр”-өө ийнхүү нэг дор хуран цуглаж, хийж бүтээсэн ажлаа дүгнэн хэлэлцэж, дуу хуур, баяр хөөртэйгөөр хамтдаа тэмдэглэн өнгөрүүллээ.