Улсын бүртгэлийн ерөнхий газар албан хаагчдынхаа албан үүргээ хэрэгжүүлэхэд шаардлагатай мэдлэг, ур чадварыг тасралтгүй эзэмшүүлэх, ажил хариуцах чадварыг сайжруулах, мэргэшсэн боловсон хүчин бэлтгэх зорилгоор “Улсын бүртгэлийн байгууллагын албан хаагчдын тасралтгүй сургалтын нэгдсэн хөтөлбөр”-ийг хэрэгжүүлж эхлээд байгаа билээ.

Энэхүү хөтөлбөрийн хүрээнд тус газар Монголын Мянганы Сорилтын сангийн хөрөнгийн эрхийн төслийн санхүүжилтээр төв, орон нутгийн нийт 32 албан хаагчийг хамруулан энэ сарын 28-аас 30-ны өдрүүдэд “Сургагч багш” бэлтгэх сургалтыг Удирдлагын академитэй хамтран 3 хоногийн турш зохион байгуулсан бөгөөд суралцагчдад өнөөдөр сертификат гардууллаа. Сургалтаар илтгэх ур чадвар, заах арга барил, сургагч багш нарын баг бүрдүүлэх, өөрийгөө хөгжүүлэх мэдлэг олгоход чиглэсэн сэдвүүдийн хүрээнд тус сургуулийн холбогдох багш нар хичээлийг заан явуулав.