Тус газар Засгийн газрын агентлагийн эрх зүйн байдлын тухай хуулийн 8.4, Төсвийн тухай хуулийн 16.5.5, Улсын бүртгэлийн ерөнхий хуулийн 8.1.2 дахь хэсэгт заасны дагуу төв орон нутгийн бүртгэлийн ажилтнуудын ажлын арга барилыг боловсронгуй болгох, мэргэшлийн ур чадварыг дээшлүүлэх, туршлага солилцох зорилгоор бүсчилсэн сургалт, зөвлөгөөнийг жил бүр зохион байгуулдаг уламжлалтай.

Тэгвэл энэ удаад орон нутгийн бүртгэлийн үйл ажиллагааг мэргэжил, арга зүйн нэгдсэн удирдлага, зохион байгуулалтаар хангах зорилгоор орон нутаг дахь бүртгэлийн албан хаагчдын 2013 оны ээлжит бүсчилсэн сургалт семинарыг энэ сарын 5-аас 14-ний өдрүүдэд 4 бүсэд зохион байгуулахаар төлөвлөөд байсны дагуу 5, 6, 7-ны өдрүүдэд Завхан, Сэлэнгэ аймагт тус тус амжилттай зохион байгууллаа. Сургалтаар орон нутаг дахь улсын бүртгэлийн байгууллагын өнөөгийн байдал, цаашдын бодлого, стратеги төлөвлөлт, хэрэгжүүлэх арга хэмжээ, бүртгэлийн үйл ажиллагааг цахим хэлбэрт шилжүүлэх зорилт, үйл ажиллагааны хэрэгжилт, анхаарах асуудлууд, авлига, ашиг сонирхлын зөрчлөөс урьдчилан сэргийлэх, төрийн албан хаагчийн ёс зүй, үйлчилгээний стандарт, төрийн албаны шинэтгэл түүнчлэн эд хөрөнгө, иргэн, хуулийн этгээдийн бүртгэлийн хууль, эрх зүйн орчны шинэчлэл, Иргэний бүртгэлийн тухай хууль, уг бүртгэлийг хөтлөх журам бүртгэлийн үйл ажиллагаанд мөрдөгдөж буй эрх зүйн актуудын шинэчлэл, ач холбогдол түүний хэрэгжилт, архивын баримтын менежмент, үйл ажиллагааны арга зүй үр нөлөө гэх мэт өргөн цар хүрээг хамарсан сэдвийн хүрээнд явагдаж өндөрлөсөн юм. Үүний зэрэгцээ хил залгаа оршдог нэг бүсийн мэргэжил нэгтнүүд өөр хоорондоо танилцан, харилцан ажлын арга барил, туршлагаа солилцож чадсанаараа чухал ач холбогдолтой боллоо.Сургалтыг Улсын бүртгэлийн ерөнхий газар, түүний харъяа газар, хэлтсийн мэргэжилтнүүд удирдан зааж явуулсан бөгөөд сургалтанд орон нутгийн бүртгэлийн нийт 300 гаруй албан хаагч хамрагдан оролцов. Харин дараагийн ээлжийн сургалт энэ сарын 12,13,14-ний өдрүүдэд Өмнөговь, Баянхонгор аймагт тус тус зохион байгуулагдах бөгөөд мөн 300 гаруй албан хаагч хамрагдах юм.