Энэ сайхан мэдээг Улсын бүртгэлийн ерөнхий газар /УБЕГ/-ын тэргүүн дэд дарга Б.Баттулга, УБЕГ-ын Хуулийн этгээдийн бүртгэлийн газрын дарга Ш.Жолбарс тэргүүтэй албаны хүмүүс өнөөдөр дуулгалаа. Одоо мөрдөж буй хуулиар бол иргэн бизнесийн байгууллагаа УБЕГ-ын Хуулийн этгээдийн бүртгэлийн газарт бүртгүүлэхийн тулд хамгийн багадаа найман удаа Зуун айлыг зорих шаардлага тулгардаг аж.

Тэгвэл энэхүү УБЕГ-ын “Шоргоолж, царцааны үлгэр” мэт ажил жинхэнэ утгаар үлгэр болон үлдэхэд ойрхон байгаа гэнэ. Иргэн, компани, аж ахуй нэгж улсдаа бүртгүүлэхийн тулд найман төрлийн бичиг баримтыг бүрдүүлж, хамгийн багадаа тав хоногийн хугацаа зарцуулж байгааг УБЕГ-ын дарга нар хэлж байна.

Харин энэ нь бодит байдал дээр хэрхэн сунжирдгийг иргэд сайн мэдэх биз ээ. Зуун айл хэмээх газрын түгжрээнд хамаг цагаа үрж очоод уртаас урт дараалалд дугаарласаар ганцхан архивын лавлагаа гаргахын тулд бүтэн өдөр болдгийг та бид мэднэ. Энэ бүхнийг шийдвэрлэх цорын ганц гарц бол цахим бүртгэлийн систем гэж тооцоолсон байна. Нэг ёсондоо бол иргэдийг Зуун айл руу нэг л удаа явдаг болгохын тулд бүхий л бүртгэлийг цахим хэлбэрээр авдаг болох юм байна. Цахим бүртгэлийн программыг хөгжүүлэх ажил одоо ид өрнөж байгаа бөгөөд ирэх долдугаар сарын сүүлч, наймдугаар сарын эхэн үе гэхэд бүрэн ашиглалтад оруулах төлөвлөгөөтэй байгаа юм байна.

Энэхүү цахим бүртгэлийн систем ашиглалтад орсноор дараах давуу боломжууд бүрдэнэ гэж УБЕГ-ынхан хэллээ.

НЭГ ШАТЛАЛ БҮХИЙ УЛСЫН БҮРТГЭЛ

Одоо мөрдөж буй хуулиар бол Улсын бүртгэгч, Улсын ахлах бүртгэгч, Хуулийн этгээд бүртгэлийн газрын дарга гэсэн гурван дамжлагаар улсын бүртгэл явагддаг байна. Харин үүнийг халж, зөвхөн улсын бүртгэгч та бидний бүртгэлийг хүлээн авч, хянах, бүр цаашлаад батлах шинэ зарчим руу шилжих аж. Цахим бүртгэлд шилжсэнээр дамжлага бүрт бүртгэх цаг хугацааг тодорхой тогтоон өгөх юм. Таны өгсөн бүртгэлийн мэдээллийн талаар хариуцагч ажилтан заасан хугацаанд зохих шийдвэр гаргахгүй, хариу өгөхгүй бол тухайн шатлалын шийдвэр гарсан гэж үзэн, дараагийн шатад хандах боломжой гэнэ. Энэ нь таны гаргасан хүсэлтийг хүндэтгэх болон цаг хугацааг хэмнэж байгаа хэрэг бололтой. Учир нь цахим системийн хамгийн гол зорилго бол иргэдэд илүү ойртсон, цаг хугацааг нь үрэхгүй, мэдээллийн ил тод байлгах явдал юм.

БҮХИЙ Л БҮРТГЭЛИЙГ ЦАХИМ БОЛГОНО

Хүсэлт гаргагч иргэн, бизнес эрхлэгчид өргөдөл, холбогдох бичиг баримтыг цахим байдлаар УБЕГ-ын шинээр нэвтрүүлэх системд илгээж, бүр цаашлаад төлбөр хураамжаа онлайн банкаар төлөх боломж нээгдэх гэнэ. Харин энэ бүхнийг бүрдүүлсний дараа УБЕГ-т ганцхан удаа очих гэнэ. Ингэхдээ иргэний үнэмлэхээ өөрийн биеэр таниулах, өргөдөлд хавсаргах шаардлагатай баримт бичгийн эх хувийг Хуулийн этгээд бүртгэлийн газарт өгөх юм. Мөн цахим гарын үсгийг хэрэгжүүлсэн тохиолдолд заавал биеэр очих шаардлагагүй болох гэнэ. Иргэн та гэрээсээ, ажлаасаа, интернэттэй газар бүрээс бүртгэлээ хийх боломж бүрдүүлэхээр ажиллаж байгаа гэнэ. Худлаа мэт санагдах ч цахим ертөнцийн өнөө үед бүтэхгүй зүйл үгүй болсон. Манайд суурилуулах цахим системийг Молдав, Гүрж зэрэг улсуудад ажилласан мэргэжлийн баг ажиллаж байгаа юм байна.

Ямартаа ч, Зуун айл хэмээх замын түгжрэл, иргэдийн бухимдлыг бардаг газарт байрладаг УБЕГ-ыг зорьж, уртаас урт дарааллын ард зогсдог мөч халагдах сурагтай.

Б.ОЙНБИЛЭГ