Монгол Улсын Ерөнхийлөгчийн сонгуулийн тухай хуульд заасны дагуу Улсын Их Хурлаас санал авах өдрийг товлон зарласантай холбогдуулан 4 дүгээр сарын 22-ны өдрөөс эхлэн 6 дугаар сарын 26-ны өдрийг дуустал иргэдийн шилжилт хөдөлгөөнийг улсын хэмжээнд 60 хоногийн хугацаанд түр зогсоогоод байгаа билээ.

Тэгвэл үүнтэй холбогдуулан тус газраас иргэдийн санал өгөх эрхийг хангах зорилгоор мөн хуулийн 20.18, 23-р зүйлд нийцүүлэн “Сонгогчдын нэрийн жагсаалт үйлдэх, танилцуулах, давхардлыг шалгах, сонгогч шилжих тухай журам”-ыг баталсан. Энэхүү журмын 5.1 дэх хэсэгт сонгогч санал авах өдрөөс арав хоногийн өмнө шилжих бол энэ тухай хүсэлтээ өөрийн байнга оршин суугаа газрынхаа харъяа хэсгийн хороонд бичгээр хүсэлтээ гаргана гэж заасан. Өөрөөр хэлбэл сонгогч шилжилт хөдөлгөөн зогссон 60 хоногийн хугацаанд, санал авах өдрөөс 10-аас доошгүй хоногийн өмнө ажлын болон гэнэтийн шаардлагаар түр болон байнгын хугацаанд аймгаас хотруу, хотоос аймагт шилжих болсон бол өөрийн амьдарч байгаа хэсгийн хороон дээр биечлэн очиж сонгогч шилжин явах тухай хүсэлтээ гаргана. Бүртгэлийн ажилтан таны хүсэлтийг хүлээн авч иргэний үнэмлэхийг үндэслэн сонгогчийн шилжүүлгийн хуудсыг танд олгоно. Үүний дараа та түр болон байнга оршин суух газрынхаа хэсгийн хороонд очиж шилжүүлгийн хуудсаа бүртгүүлж баталгаажуулснаар санал авах өдөр санал өгөх боломжоор хангагдах юм. Хамгийн гол нь санал авах өдрөөс 10-аас доошгүй хоногийн өмнө сонгогчийн шилжүүлгийг заавал хийлгэж баталгуужуулсан байх ёстойг анхаарна уу.