Улс төрийн намуудаас 2013 оны 5 дугаар сарын 21-ний өдөр хийсэн хэвлэлийн бага хурлаар Ерөнхийлөгчийн сонгуулийн сонгогчдын нэрийн жагсаалттай холбогдуулан гаргасан мэдэгдэлд Улсын бүртгэлийн ерөнхий газраас нийт сонгогч олонд хандан дараах хариу мэдэгдэлийг гаргаж байна.
УБЕГ нь Монгол Улсын Ерөнхийлөгчийн сонгуулийн тухай хуулийг хэрэгжүүлэх ажлын хүрээнд Сонгогчдын нэрийн жагсаалтыг иргэний бүртгэлийн мэдээллийн улсын сан дахь сонгогчийн бүртгэлд үндэслэн үйлдэх, нягтлан шалгах, давхардлыг арилгах, сонгогчдын нэрийн жагсаалтад бүртгэгдээгүй сонгуулийн эрх бүхий иргэнийг бүртгэх зэрэг ажлыг хуулийн дагуу улсын хэмжээнд зохион байгуулан ажиллаж байна. Ерөнхийлөгчийн сонгуулийн тухай хуулийн 20 дугаар зүйлийн 20.4 дэх хэсэгт заасны дагуу өөрийн www.burtgel.mn цахим хуудаст сонгогчдын нэрийн жагсаалтад байгаа сонгуулийн эрх бүхий нийт 1902288 иргэний мэдээллийг 3 дугаар сарын 01-ний өдөр урьдчилсан байдлаар байрлуулж сонгогчийг өөрийн мэдээлэлтэй танилцах боломжоор хангасан. Мөн Ерөнхийлөгчийн сонгуулийн тухай хуулийн 20.6 дахь хэсэгт заасны дагуу 2013 оны 4 дүгээр сарын 25-наас 5 дугаар сарын 15-ны өдрүүдэд Улсын дээд шүүхээс эрх зүйн чадамжгүй нь шүүхийн шийдвэрээр тогтоогдсон сонгуулийн насны иргэдийн мэдээлэл, Шүүхийн шийдвэр гүйцэтгэх ерөнхий газраас санал авах өдөр хорих газарт ял эдэлж байх сонгуулийн насны иргэдийн мэдээлэл, Хил хамгаалах ерөнхий газраас 60 ба түүнээс дээш хоногийн хугацаагаар гадаад улсад зорчсон иргэдийн мэдээлэл, Батлан хамгаалах яамнаас санал авах өдөр зэвсэгт хүчний цэргийн анги, нэгтгэлд алба хааж байгаа боловч тухайн сум, дүүргийн нутаг дэвсгэрт байнга оршин суух бүртгэлгүй сонгогчдын мэдээллийг жагсаалтаар авч, улсын бүртгэлийн мэдээллийн нэгдсэн санд тулган шалгаж, нягтлах ажил хийгдэж байна. Сонгогчдын нэрийн жагсаалтад иргэний мэдээллийг зөвхөн нэг удаа бүртгэх бөгөөд ийнхүү бүртгэхэд уг мэдээлэл тухайн сонгогчийн биеийн давхцахгүй өгөгдөл /гарын хурууны хээ/-өөр хянагдсан байх тул сонгогчдын нэрийн жагсаалтад сонгогч давхар бүртгэгдэх боломжгүй болно. Ерөнхийлөгчийн сонгуулийн тухай хуулийн 20 дугаар зүйлийн 20.9 дэх хэсэгт заасны дагуу цахим хуудаст байрлуулсан сонгогчдын нэрийн жагсаалтад хуульд заасан холбогдох өөрчлөлтийг тусган 6 дугаар сарын 01-ний өдрийн дотор сонгогчдын нэрийн жагсаалтыг гаргаж аймаг, нийслэлийн сонгуулийн хороонд хүргүүлэх ёстой. Гэтэл бүртгэлийн байгууллагаас сонгогчдын нэрийн жагсаалтыг албан ёсоор эцэслэн гаргах хуулийн хугацаа болоогүй байхад сонгогчдын нэрийн жагсаалтын талаар улс төрийн намууд мэдэгдэл гаргаж байгаа нь сонгогчдыг төөрөлдүүлсэн ташаа мэдээлэл юм.
УЛСЫН БҮРТГЭЛИЙН ЕРӨНХИЙ ГАЗАР
