Улсын бүртгэлийн ерөнхий газраас Монгол улсын Ерөнхийлөгчийн сонгуулийн тухай хуулийн 20.4 дэх хэсэгт заасны дагуу өөрийн байгууллагын www.burtgel.mnцахим хуудаст энэ сарын 22-ны байдлаар улсын хэмжээнд хэсэг оноогдсон 1,896,382 иргэний мэдээлэл буюу cонгогч аль хэсгийн хороонд санал өгөх, санал өгөх байршлын талаар мэдэх боломжтой веб програмыг шинэчлэн суурилуулах ажлыг бүрэн хийж дуусгалаа.

Програм шинэчлэгдэж дээрх нийт иргэдийн мэдээллийг цахим хуудаст байршуулснаар сонгуулийн эрх бүхий иргэн аль хэсгийн хороонд санал өгөх, санал өгөх газрын байршлын талаар мэдэх боломжтойгоос гадна сонгогчдын нэрийн жагсаалт дахь зөвхөн өөрт холбогдох мэдээлэлтэй танилцах юм.Иймд Иргэн Та Улсын бүртгэлийн ерөнхий газрын www.burtgel.mn цахим хаягаар орж нүүрэн хэсэгт байрлах “Ерөнхийлөгчийн сонгууль 2013” цонхны “энд дарна уу” гэсэн хэсгийг даран нэвтэрч ороод регистрийн дугаараа оруулж зөвхөн өөрт хамааралтай мэдээлэлтэй танилцахын зэрэгцээ санал өгөх хэсэг болон байршлаа мэдэж авна уу. Хэрэв таны хувийн мэдээлэл зөв бол “баталгаажуулах” зөрүүтэй бол “мэдэгдэх” хэсгийг дарна. Таны болон таны гэр бүлийн аль нэг гишүүний нэр сонгогчдын нэрийн жагсаалтад бүртгэгдээгүй буюу буруу бүртэгдсэн байвал Монгол Улсын Ерөнхийлөгчийн сонгуулийн тухай хуульд заасны дагуу өөрийн болон гэр бүлийн гишүүдийн нэрийн өмнөөс санал авах өдрөөс 10-аас доошгүй хоногийн өмнө зөрчлийг арилгуулах талаар оршин суугаа харъяа сум, дүүргийнхээ иргэний бүртгэлийн тасагт бичгээр гомдол гаргах эрхтэй. Энэ талаар улсын бүртгэлийн нэгдсэн лавлах 1890 утсанд холбогдож өөрт хэрэгтэй зөвлөгөө, мэдээллийг авч болно.