Улсын бүртгэлийн ерөнхий газар, Сонсголгүй иргэдийн мэдээллийн төв хамтран улсын бүртгэлийн байгууллагад хөгжлийн бэрхшээлтэй иргэдийн үйлчлүүлэх эрхийг хангах, тэдний нийгмийн оролцоо, идэвхийг нэмэгдүүлэх зорилгоор “Төрийн үйлчилгээг хүртээмжтэй болгох нь” сэдэвт сургалтыг энэ сарын 6-9-ний өдрүүдэд зохион байгуулж, өнөөдөр суралцагчдад сертификат гардуулав.

Хөгжлийн бэрхшээлтэй иргэнтэй харьцах дохионы хэлний анхан шатны сургалтанд тус газрын үйлчилгээний 26 ажилтан хамрагдсан бөгөөд тэд хүний эрхийн талаар ерөнхий ойлголттой болох, адил тэгш байдал, үл алагчлал, өөрийн ажлаараа хөгжлийн бэрхшээлтэй иргэнд хэрхэн хүртээмжтэй үйлчлэх, сонсголгүй иргэдтэй харилцах харилцан ярианы арга барилыг эзэмших, дадал чадвар олж байгаагаараа ихээхэн онцлогтой юм. Сургалтыг хөгжлийн бэрхшээлтэй хүний эрхийн комиссын сургагч багш, дохионы хэлний хэлмэрч орчуулагчдын холбооны тэргүүн Л.Соёлмаа болон дохионы хэлний стандарт боловсруулах ажлын хэсгийн гишүүд заан явуулав.