Монгол Улсын Ерөнхийлөгчийн сонгуулийн тухай хуулийг хэрэгжүүлэх ажлын хүрээнд Нийслэлийн улсын бүртгэлийн газраас “Иргэний баримт бичгийн зөрчил арилгах, иргэний баримт бичиггүй иргэдийг бичиг баримтжуулах нэг сарын аян”-ыг гуравдугаар сарын 23-ны өдрөөс эхлүүлсэн.

Аяны хүрээнд дүүрэг, хорооны иргэний тоо, хаягийн бүртгэлийн үнэн зөв эсэхийг шалгах, иргэний бүртгэл мэдээлэл, шилжилт хөдөлгөөний болон иргэний үнэмлэх бүртгэлийн зөрчлийг илрүүлж арилгуулах, холбогдох өөрчлөлтийг мэдээллийн санд тусгуулах, нэн ядуу болон огт баримт бичиггүй иргэдийг судалгаанд хамруулах, зөрчлийг арилгах зэрэг ажлыг нийслэлийн хэмжээнд зохион байгуулж байна. Судалгаанд одоогийн байдлаар нийт 274 мянга гаруй иргэн хамрагдсанаас 6483 иргэний зөрчил илрүүлэн 2537 иргэний зөрчлийг арилгаад байна. Мөн үндсэн мэдээллийн санд тусгах, хаягийн хөдөлгөөний, ургийн овог, эцгийн нэр, нэрийн зөрчилтэй 337 иргэний өргөдлийг хүлээн авч шийдвэрлэн 44 иргэнд иргэний үнэмлэх хэвлүүлэн олгоод байна. Мөн нэн ядуу иргэдийг бичиг баримтжуулах зорилгоор Амьдрах ухаан сургалтын төвтэй хамтарч ажиллах хүрээнд огт баримт бичиггүй 80 иргэний судалгааг гаргуулж, 181 иргэний мэдээллийг шалган 34 иргэнд биечлэн холбогдох заавар зөвлөгөө өгч, ажилласан байна. Түүнчлэн иргэний үнэмлэхийн лавлагаа олгож, иргэний дахин олголтын бүртгэлийг баталгаажуулах ажлыг хийв. Дээрх иргэдийн дийлэнхи нь орон нутгийн шилжүүлэггүй болон иргэний баримт бичиггүй, үрэгдүүлсэн, ургийн овог, овог нэрийн зөрүүтэй зэрэг зөрчилтэй байсныг зохих журмын дагуу шийдвэрлээд байна.