Жил бүрийн удирдах ажилтнуудын зөвлөгөөнөөр төв, орон нутгийн Улсын бүртгэлийн хэлтсийн үйл ажиллагааг дүгнэж, байр эзлүүлэн шагнадаг уламжлалтай билээ. Энэ дагуу улсын бүртгэлийн байгууллага төв, орон нутгийн шилдгүүдээ тодруулав.

2012 оны тэргүүн байрт Өмнөговь аймгийн Улсын бүртгэлийн хэлтэс шалгарсан бол Ховд аймгийн Улсын бүртгэлийн хэлтэс хоёрдугаар байр, Дорноговь аймгийн Улсын бүртгэлийн хэлтэс гуравдугаар байрыг тус тус эзэлсэн. Мөн тусгай байрт Завхан аймгийн Улсын бүртгэлийн хэлтэс болон Нийслэлийн улсын бүртгэлийн газар шалгарав. Түүнчлэн Орхон, Өвөрхангай аймгийг архив цахимжуулах ажилд идэвхи, санаачлагатай үр бүтээлтэй ажиллаж байгааг нь үнэлж шагнаж урамшуулсан. Ажлын амжилтаараа шалгарсан дээрх аймгуудад Улсын бүртгэлийн ерөнхий газрын дарга Ц.Пүрэвдорж “Батламж”, мөнгөн шагнал гардуулаад цаашдын ажилд нь амжилт хүслээ.