Өнгөрсөн оны үйл ажиллагааны үр дүнгийн гэрээ, төлөвлөгөөний биелэлт, ажлын ололт амжилтаа бататган дүгнэн, анхаарах шаардлагатай асуудлаа хэлэлцэж цаашид хийж, хэрэгжүүлэх ажлаа ярилцдаг уламжлалтай улсын бүртгэлийн байгууллагын төв, орон нутгийн удирдах ажилтны нэгдсэн сургалт, зөвлөгөөн гурван өдрийн турш үргэлжлэн явагдаж амжилттай болж өндөрлөлөө.

Удирдах ажилтны энэ удаагийн сургалт, зөвлөгөөн шинэ бүтэц бүрэлдэхүүн, шинэ тогтолцоотойгоор зохион байгуулагдлаа. Мөн Монгол Улсын ерөнхийлөгчийн сонгуулийн тухай хууль, түүнийг хэрэгжүүлэх нарийвчилсан төлөвлөгөөний талаар сургалт өгөх, энэ хүрээнд хийх ажлын талаарх чиглэлийг тодорхойлох, сонгогчдын нэрийн жагсаалтыг нягтлан шалгах, түүнд өөрчлөлт оруулах журмын төслийн хэлэлцүүлэг өрнүүлэх, аймаг орон нутаг бүр хэлтсийн үйл ажиллагааний талаарх дэлгэрэнгүй танилцуулга хийснээрээ онцлогтой боллоо. Зөвлөгөөний үеэр Хууль зүйн яамны Бодлогын хэрэгжилтийг зохицуулах газрын дарга О.Алтангэрэл оролцсон бөгөөд тэрээр Шинэчлэлийн засгийн газрын болоод Хууль зүйн яамны бодлого, шинэчлэлийн хүрээнд хийх зайлшгүй шаардлагатай хууль эрх зүйн орчны талаар товч мэдээлэл өгсөн. Эрх зүйн харилцааны гол суурь бүртгэл гэдгийг онцолж байлаа. Мөн бүртгэлийн байгууллагын албан хаагчдыг аль болох эрх зүйн мэргэжилтэй байх ёстой гэж харж байна. Бүртгэлийн үйлчилгээг иргэдэд ойртуулж, шуурхай хүртээмжтэй хүргэхэд орон байрны асуудал нэн чухал. Тиймээс яамны зүгээс зарим аймгаар явж, бүртгэлийн үйлчилгээний шат дамжлагыг багасгах, цогц үйлчилгээг бүрдүүлэх боломж бололцоо бий эсэх талаар судалж байна гэлээ. Тэрээр мөн нэн чухал асуудлын нэг албан хаагчдын сахилга хариуцлага, авлигаас ангид байх тал дээр маш сайн хяналттай байж, ажилтнуудыг энэ талын хэрэгт холбогдохоос сэргийлэх, өртүүлэхгүй байхад анхаарч ажиллах ёстойг удирдах ажилтнуудад санууллаа. Гурван өдрийн турш үргэлжилсэн сургалт, зөвлөгөөнөөр Монгол Улсын Ерөнхийлөгчийн сонгуулийн үйл ажиллагааг зохион байгуулах хууль, эрх зүйн орчин, холбогдох журам, бүртгэлийн байгууллагын ажилтан итгэмжлэгдсэн ажилтны гүйцэтгэх чиг үүрэг, хариуцлагын талаар, мөн эд хөрөнгө, хуулийн этгээд , иргэний бүртгэлийн үйл ажиллагаанд гарч буй зөрчил дутагдал, шийдвэрлэхэд хүндрэлтэй асуудлууд, 2013 оны бүртгэлийн албаны төлөвлөгөөт ажлыг хэрэгжүүлэн ажиллахад анхаарах асуудлуудын талаар улсын бүртгэлийн ерөнхий газрын холбогдох албан тушаалтнууд илтгэл тавин хамтран ярилцаж, хэлэлцсэнээр энэ удаагийн удирдах ажилтнуудын зөвлөгөөн урьд жилүүдийнхээс илүү үр дүнтэй, ач холбогдолтой болсон юм. Нэгдсэн семинараар мөн төрийн албаны хүний нөөцийн чиглэлээр удирдах ажилтнуудын анхаарах асуудал, өөрчлөлтийн менежмент, удирдах албан тушаалтны манлайлал, олон талт мэдлэгийг хэрэгжүүлэх зорилгоор төрийн албан хаагчийн үйл ажиллагаанд шинээр батлагдсан хууль тогтоомжийг сурталчлан таниулах, үр дүнгийн гэрээ байгуулах, дүгнэх, төрийн албаны хүний нөөцийн чиглэлээр удирдах ажилтнуудад анхаарах асуудал зэрэг сэдвийн хүрээнд Төрийн албаны зөвлөл, Хууль зүйн яамны холбогдох албан тушаалтнууд, сургагч багш оролцож шаардлагатай мэдээлэл хийж, зөвлөгөө чиглэл өгсөн. 2013 онд улсын бүртгэлийн байгууллагаас Монгол Улсад бүртгэл, мэдээллийн нэгдсэн тогтолцоог бий болгох Үндэсний хөтөлбөр, Монгол Улсын Засгийн газрын 2012-2016 оны үйл ажиллагааны хөтөлбөрийг хэрэгжүүлэх арга хэмжээний хүрээнд Улсын бүртгэлийн архивын баримтыг цахимжуулах, Хууль зүйн албарын хууль тогтоомжийн уялдаа холбоог сайжруулах, нээлттэй бодлогыг хэрэгжүүлж хангах, ажилтнуудын харилцааны соёл, сахилга, хариуцлага, иргэдэд үзүүлсэн төрийн үйлчилгээний хүртээмж, чанар, үр нөлөөг дээшлүүлэх, үйлчилгээг боловсронгуй болгож шат дамжлагыг багасгах, улсын бүртгэлийн үйл ажиллагаанд тавих хяналт байгууллагын стратеги үйл ажиллагаа, бодлогыг хэрэгжүүлэхээр голлон төлөвлөөд байна. Ийнхүү зөвлөгөөний төгсгөлд Улсын бүртгэлийн ерөнхий газрын дарга Ц.Пүрэвдорж төв, орон нутгийн удирдах ажилтнуудтай 2013 оны үйл ажиллагааны үр дүнгийн гэрээ байгуулж, улсын бүртгэлийн байгууллагын үйлчилгээг иргэдэд чанартай хүртээмжтэй хүргэх, мэдээллийн ил тод нээлттэй байдлыг хангах, ажлын ахиц дэвшилт гаргаж хуулиар хүлээсэн үүргийнхээ дагуу хариуцлагатай байж, онцгой анхаарч ажиллах талаар үүрэг, даалгавар өглөө.