Улсын бүртгэлийн ерөнхий хууль, Иргэний бүртгэлийн тухай хууль, Гэр бүлийн тухай хууль болон Монгол Улсын Ерөнхийлөгчийн сонгуулийн тухай хуулийн хэрэгжилтийг хангахтай холбогдуулан “Иргэний баримт бичгийн зөрчил арилгах, баримт бичиггүй иргэдийг бичиг баримтжуулах сарын аян ”-ыг Нийслэлийн Улсын бүртгэлийн газар өнөөдрөөс нийслэлийн хэмжээнд эхлүүллээ.

Уг аяны зорилго дүүрэг, хорооны иргэний тоо, хаягийн бүртгэлийн үнэн зөв эсэхийг шалгах, иргэний бүртгэл мэдээлэл,шилжилт хөдөлгөөний болон иргэний үнэмлэх бүртгэлийн зөрчлийг илрүүлж арилгуулах, холбогдох өөрчлөлтийг мэдээллийн санд тусгуулах, нэн ядуу болон огт баримт бичиггүй иргэдийг бичиг баримтжуулахад оршино. Нийслэлийн улсын бүртгэлийн газар нь иргэдийн баримт бичгийн зөрчлийг арилгах, баримт бичиггүй иргэдийг бичиг баримтжуулах сарын аянг энэ оны 3 дугаар сарын 20-ны өдрөөс эхлэн 4 дүгээр сарын 20 хүртэл хугацаанд нийслэлийн хэмжээнд явуулах юм. Иймд нийслэлд оршин сууж байгаа иргэний баримт бичгийн болон шилжилт хөдөлгөөний бүртгэлийн зөрчилтэй , огт бичиг баримтгүй иргэд дээр дурьдсан хугацаанд тухайн дүүрэг, хорооны иргэний бүртгэлийн ажилтанд хандан судалгаанд хамрагдан баримт бичгийн зөрчлөө арилгуулах боломжтой. Мөн энэ хүрээнд тус газраас огт баримт бичиггүй нэн ядуу иргэдийг төрийн болон төрийн бус байгууллагатай хамтран бичиг баримтжуулах арга хэмжээг тодорхой үе шаттайгаар зохион байгуулахаар төлөвлөөд байна.