Төрийн байгуулалтын байнгын хорооныхон өнөөдөр Улсын бүртгэлийн ерөнхий газарт ажиллав. Тэд Монгол Улсын Ерөнхийлөгчийн сонгуулийн тухай хуульд заасан сонгуулийн бэлтгэл ажлын явц, сонгуулийн ажлын цаг хугацааны графикийг төлөвлөн, хэрэгжүүлж байгаа байдал, сонгогчдын нэрийн жагсаалт үйлдэх явц, түүнд тавьж буй хяналт болон сонгуулийн ажлыг хэрхэн хангаж ажиллаж байгаатай танилцлаа.
Улсын бүртгэлийн ерөнхий газраас Монгол Улсын Ерөнхийлөгчийн сонгуулийн тухай хуулийг хэрэгжүүлэх ажлын хүрээнд сонгуулийн графикчилсан ажлын төлөвлөгөө гарган хэрэгжүүлж эхлээд байгаа бөгөөд уг хуулийн холбогдох зүйл заалтын дагуу бусад ажлын бэлтгэлийг хангаж байгаа талаар Улсын бүртгэлийн ерөнхий газрын даргын зөвлөх Д.Энхцэцэг дэлгэрэнгүй танилцуулсан. Улсын бүртгэлийн ерөнхий газраас хуулийг хэрэгжүүлэх эхний ажлын хүрээнд өөрийн байгууллагын цахим хуудсанд сонгуулийн насны нийт иргэдийн сонгогчдын нэрийн жагсаалтыг хуулийн хугацаанд байршуулж иргэн бүрийг өөрийн мэдээлэлтэй танилцах боломжоор хангасан. Мөн оршин суугчдын байнгын оршин суугаа газрын мэдээллийн санг сум, дүүргийн иргэдийн Төлөөлөгчдийн Хурлын Тэргүүлэгчдэд албан ёсоор цахим хэлбэр /диск/-ээр хүргүүлсэн байгаа. Түүнчлэн нийслэлийн хэмжээнд баримт бичгийн зөрчлийг арилгах, баримт бичиггүй иргэдийг баримт бичигжүүлэх сарын аянг өрнүүлж эхлээд байна.
Тус газрын дарга Ц.Пүрэвдорж сонгогчдыг санал өгөх боломжоор хангаж, иргэний үнэмлэхийн тараалтыг эрчимжүүлэх, хаяж үрэгдүүлсэн, алдаатай хэвлэгдсэн болон цахим үнэмлэх огт хэвлэгдээгүй байгаа 18-аас дээш насны иргэний цахим үнэмлэх олгох ажлыг эрчимжүүлэх, Улсын бүртгэлийн удирдах болон итгэмжлэгдсэн ажилтнууд, улсын бүртгэгч нарт эрх зүйн мэдлэг олгох зорилгоор сургалт, семинар зохион байгуулах, програм, мэдээлэл технологийн шуурхай баг ажиллуулах зэрэг төлөвлөгөөний дагуу шат дараатай авч хэрэгжүүлэх олон ажлууд хүлээж байгааг онцлон дурьдаад бэлтгэл ажлыг хангаж байна гэсэн. Төрийн байгуулалтын байнгын хорооныхон энэ үеэр Улсын бүртгэлийн ерөнхий газрын удирдлагуудад хандаж сонгуулийн ажлын зарим зүйлийн талаар тодруулаад цахим хуудастаа байршуулсан сонгогчдын нэрийн жагсаалттай иргэд яг ямар байдлаар, яаж танилцах талаарх зааврыг вэб хуудсандаа байршуулахыг даалгасан. Мөн сүүлийн үед цахим үнэмлэх хэвлэгдэхгүй удаж байна гэсэн гомдол иргэдээс гарах боллоо, үнэмлэх хэвлэж байгаа эсэхийг лавлахад Улсын бүртгэлийн ерөнхий газрын дарга бид нөөц бололцоон дээрээ тулгуурлан хэвийн хэвлэж байгаа, энэ сарын сүүлээр бэлдэц нийлүүлэгдэнэ гэдгийг уламжилсан. Ийнхүү ажлын явц, байдалтай танилцсаны дараа Төрийн байгуулалтын байнгын хорооны гишүүд сонгуулийн хуулийг хэрэгжүүлэх, энэ чиглэлээр хийгдсэн болон хийгдэж байгаа ажилд үнэлэлт өгч, хуулийн заалтыг нэг бүрчлэн биелүүлэхэд анхаарах шаардлагатай асуудал байгаа эсэх талаар санал, дүгнэлт бүхий танилцуулгаа бэлтгэн 2 хоногийн дотор ирүүлэхийг үүрэг болгов.
