Улсын бүртгэлийн ерөнхий газар Хуулийн этгээдийн улсын бүртгэлийн газрын үйл ажиллагаа, үйлчилгээний шат дамжлагыг хөнгөвчлөх, цахимжуулах, мэдээллийн ил тод байдлыг хангахад чиглэсэн ажил, арга хэмжээг авч хэрэгжүүлэхээр бэлтгэл ажлуудыг хангаж эхлээд байна.

Энэ хүрээнд эхний ээлжинд Улсын бүртгэлийн ерөнхий газрын даргын 2011 оны 414 дүгээр тушаалаар батлагдан мөрдөж байсан “Хуулийн этгээдийг улсын бүртгэлд бүртгэх журам”-ыг шинэчилсэн найруулгаар батлан энэ оны 2 дугаар сарын 27-ны өдрөөс тус газарт мөрдөж эхлээд байна. Энэхүү журмаар хуулийн этгээдтэй холбоотой улсын бүртгэлийг өргөдөл хүлээн авах, улсын бүртгэлийг хийж байхаар хоёр ангилж, улмаар улсын бүртгэгч нарын чиг үүргийг тодорхойлон бүртгэлийн ажлыг 2-3 хоногт багтаан гүйцэтгэж байхаар тусгаад байна. Мөн улсын бүртгэгч нарын чиг үүргийг нарийвчлан тодорхойлж өгөөд байна. Тухайлбал, Шинээр байгуулагдсан болон нэмэлт өөрчлөлтөө бүртгүүлэхээр ирсэн иргэн хуулийн этгээдийн баримт бичгийг хүлээн авах дөрвөн улсын бүртгэгчийн бүрэлдэхүүнтэй “Өргөдөл хүлээн авах ” цонх ажиллуулж эхэлсэн. Түүнчлэн иргэн хуулийн этгээдээс ирүүлсэн баримт бичгийг улсын бүртгэлд бүртгэх таван улсын бүртгэгчийн бүрэлдэхүүнтэй “Улсын бүртгэл хийх” баг ажиллуулж эхлээд байна. Хуучин хэрэгжиж байсан журмаар шинээр байгуулагдсан хуулийн этгээдийг болон тухайн хуулийн этгээдээс нэмэлт, өөрчлөлт оруулснаар улсын бүртгэлд бүртгүүлэхтэй холбоотой асуудлыг шийдвэрлэхэд ажлын 3-5 хоног шаарддаг байсан. Энэ нь тус газраас үйлчилгээ авч байгаа иргэн, хуулийн этгээдийг бухимдуулах, үйлчилгээний шуурхай байдал алдагдах, үйлчлүүлэгчдийн дараалал ихсэх зэрэг сөрөг үр дагавар гарч байсныг ийнхүү уг шинэчилсэн журмаар зохицуулж өгсөнөөр иргэдийн үйлчилгээ авах шат дамжлага, цаг хугацааг хэмнэсэн дэвшилттэй ажил болох юм.