Хууль зүйн сайд Х.Тэмүүжин өнгөрсөн долоо хоногт Улсын бүртгэлийн ерөнхий газрын үйл ажиллагаатай газар дээр нь очиж танилцлаа. Тэрээр эхлээд Баянгол дүүргийн Улсын бүртгэлийн хэлтсийн үйл ажиллагаа, үйлчилгээ ямар орчинд нөхцөлд явагдаж байгаатай танилцсан.

Баянгол дүүргийн Улсын бүртгэлийн хэлтэс нь тус дүүргийн Засаг даргын Тамгын газрын байранд үйлчилгээ явуулдаг. Ажлын байр савны хүрэлцээ муу, ажиллах нөхцөл зориулалтын бус, ажил үйлчилгээ явуулахад хүндрэлтэй байдаг. Улсын бүртгэлийн ерөнхий газрын хэрэгжүүлж буй иргэн, эд хөрөнгө, хуулийн этгээдийн архивын цахимжуулалтыг Баянгол дүүрэгт эхлүүлэхээр бэлтгэл ажил хангагдаад байгаа. Гэтэл уг ажлыг эхлүүлэхэд байрны болоод ажиллах орчин нөхцөл хүндрэлтэйн улмаас цахимжуулалтын ажил зогсоход хүрээд байгаа талаар Нийслэлийн Улсын бүртгэлийн газрын дарга С.Содномдорж ярьж байлаа. Баянгол дүүргийн Улсын бүртгэлийн хэлтсийн үйл ажиллагаатай танилцсаны дараа сайд дүүргийн Засаг даргатай газар дээр нь уулзаж, уг асуудлаас гарах арга замын талаар ярилцсаны үр дүнд Засаг дарга Улсын бүртгэлийн хэлтсийн албан хаагчдын ажиллах орчин нөхцлийг сайжруулах, байр савны асуудлыг зохицуулахад боломжтой бүхий л арга хэмжээ авч ажиллах болно гэдгээ сайдад уламжилсан. Эндээс хөдлөөд Улсын бүртгэлийн ерөнхий газрын үйлчилгээ төвлөрсөн олны хэлж заншсанаар 100 айлд байрлах үйлчилгээний байраар нэг бүрчлэн орж, иргэдийн үйлчлүүлдэг үйлчилгээний заал болон албан хаагчдын ажиллаж байгаа орчин нөхцөл, бодит байдал ямар байгаатай танилцлаа. Улсын бүртгэлийн ерөнхий газрын үйлчилгээний 1, 2, 3 дугаар байранд эд хөрөнгө, хуулийн этгээд, архив, гадаад паспорт олгох зэрэг үйлчилгээнүүд явагддаг. Түүнчлэн архивын цахимжуулалтын ажил хийгдэж байгаа. Эдгээр байр нь иргэдийн хөл хөдөлгөөн, үйлчлүүлэгч ихтэй, байр савны хүрэлцээ муу, давчуу байдгаас иргэдийн бухимдал оочер дараалал үүсдэг зэрэг хүндрэл бэрхшээлүүд байдаг. Энэ үеэр Улсын бүртгэлийн ерөнхий газрын Тэргүүн дэд дарга Т.Баттулга тус газрын үйл ажиллагааг сайжруулах, цаашид хийх ажлын ерөнхий стратеги төлөвлөгөөний талаар дэлгэрэнгүй танилцууллаа. Хамгийн гол нь иргэний эрх ашгийг эрхэмлэсэн, иргэндээ шуурхай төр, нийтийн үйл ажиллагааг хүргэсэн байгуулага болох улмаар хувийн хэвшлийн үйл ажиллагааг илүү дэмжих тал дээр УБЕГ-ын зүгээс бүх зүйлийг хийх болно. Ерөнхийдөө эдийн засгийг дэмжигч байгуулага болно гэдгийг хэлсэн. Түүнчлэн хөгжлийн стратеги төлөвлөгөө гаргаж хийх ажлыг схемээр тодорхойлсон. Тухайлбал, бүтцийн оновчтой зохион байгуулалт, бүртгэлийн орчин үеийн систем нэвтрүүлэх, шинэчлэл хийх, мэдээллийн сангийн аюулгүй байдлыг хангах, дэвшил хийх, төрөл бүрийн сургалтыг хийх, цогц систем боловсруулах, байр орчинг сайжруулах зэрэг арга хэмжээг авч хэрэгжүүлэхээр төлөвлөөд байгаагаа сайдад танилцуулав. Хууль зүйн сайд Х.Тэмүүжин улсын бүртгэлийн байгууллагын хууль эрх зүй, дүрэм журам болоод үйл ажиллагаа, үйлчилгээг шинэчлэх, ахиулах зайлшгүй шаардлагатай олон ажлууд байгааг онцлоод ажлын байрны орчин нөхцлийг сайжруулах, иргэн, эд хөрөнгө, хуулийн этгээдийн бүртгэлийн үйлчилгээг цогцоор нь шинэчлэх, техник технологи хийгээд гадаад паспорт, хүүхдийн бүртгэлийн шинэчлэлийг ойрын үед эхлүүлэхэд онцгой анхаарч ажиллахыг даалгав. Есдүгээр сарын нэгэн гэхэд энэ бүхэн бодит ажил болон хэрэгжиж үр дүнгээ өгсөн байхыг үүрэг болголоо.