Монголын Мянганы Сорилтын Сангийн Хөрөнгийн Эрхийн төсөл болон Аймгийн ЗДТГазар, Улсын бүртгэлийн хэлтэстэй хамтран “Хашааны газрын өмчлөл ба эрхийн бүртгэлийн ажил”-ыг амжилттай зохион байгуулж дууслаа. Тэгвэл энэ хүрээнд төслийн үр шимийг хүртсэн, төсөлд хамрагдсан аймгийн 20 иргэнд газар өмчлөх эрхийн гэрчилгээг гардуулан өгөх ёслолын ажиллагаа Өвөрхангай аймагт болов.

Энэ үеэр хүндэт зочид төслийн үйл ажиллагааг амжилттай хэрэгжсэнийг дүгнэн онцолж, сэтгэгдлээ илэрхийлсэн юм.

Хөрөнгийн эрхийн төслийн багийн хамт олноос Аймгийн газрын харилцаа болон Барилга, Хот байгуулалтын газарт “хашааны газрын өмчлөл ба эрхийн бүртгэлийн ажлын судалгаа”-ны ажлын үр дүн болох архивын материалыг хүлээлгэн өгөв.Мөн энэ үеэр Монголын Мянганы сорилтын сангийн санхүүжилтээр хөрөнгийн эрхийн төслийн хүрээнд авч хэрэгжүүлсэн ажлуудыг зочдод танилцууллаа. Өвөрхайнгай аймгийн Улсын бүртгэлийн хэлтэс нь орон нутгийн дэмжлэгтэйгээр 2009 онд ажлын байртай болж улмаар байрны засвар өөрчлөлтийг 209,5 мянган ам долларын хөрөнгө оруулалтаар хийсэн. Ингэснээр нэг талаас иргэд иргэн, эд хөрөнгө, хуулийн этгээдийн бүртгэлийн бүхий л үйлчилгээг нэг цэгээс хөнгөн, шуурхай авах боломж бий болсон нөгөө талаас үйлчлүүлэгчдэд ая тухтай, тохилог орчинд төрийн үйлчилгээг үзүүлэх нөхцлийг хангаж өгсөн. Мөн Аюулгүй байдлыг хангасан дохиоллын болон агааржуулалтын иж бүрэн тоног төхөөрөмж, албан хаагчдын ажлын цагийн цахим бүртгэл, үйлчилгээний дарааллын систем зэрэг орчин үеийн үйлчилгээний байгууллагын соёлыг харуулсан тоног төхөөрөмжөөр тоноглогдсон нь ихээхэн ач холбогдолтой ажил болсон байна. Уг төслөөс Улсын бүртгэлийн хэлтсийн үйл ажиллагааг хэвийн явуулахад зориулж 44,5 мянган долларын үнэ бүхий авто машин, ажлын орчныг сайжруулж бүртгэлийн үйл ажиллагааг хөнгөвчлөх, мэдээлэл технологийг сайжруулахад зориулж оффиссын албан хэрэгцээний тавилга худалдан авахад зориулж 13,5 сая төгрөг, мэдээлэл технологийн худалдан авалтанд зориулж 88,8 мянган долларын хөрөнгө оруулалтыг тус тус хийсэн байна. Монголын Мянганы сорилтын сангийн санхүүжилтээр хөрөнгийн эрхийн төслийн хүрээнд хийгдэж буй томоохон ажлуудын нэг болох бүртгэлийн цахим системийг нэвтрүүлэх ажил юм. Иймд төслийн үндсэн чиглэлийн дагуу нийт 17100 хувийн хэргийг цахимжуулахаар цахимжуулалтын баг өнгөрсөн оны 9 сараас ажиллаж эхлээд байгаа бөгөөд одоогийн байдлаар цахимжуулах хувийн хэргийн 35 хувь, цахимжуулах нийт хуудасны 51 хувийг цахимжуулаад байгаа юм байна. Ёслолын арга хэмжээнд тус аймгийн Засаг дарга Д.Тогтохсүрэн, аймгийн Иргэдийн төлөөлөгчдийн хурлын дарга Г.Ганболд, Монголын Мянганы Сорилтын Сангийн гүйцэтгэх захирлын үүрэг гүйцэтгэгч Б.Батбаатар, АНУ-ын Мянганы Сорилтын Корпорацийн Монгол дахь суурин төлөөлөгч Роберт И.Рийд , Монголын Мянганы Сорилтын Сангийн Хөрөнгийн эрхийн төслийн захирал П.Хулангоо, Газрын харилцаа геодези зураг зүйн газрын даргын үүргийг түр орлон гүйцэтгэгч А.Хүрэлшагай болон бусад холбогдох албаны хүмүүс оролцлоо.