Тус газрын дарга Ц.Пүрэвдорж өнгөрсөн Пүрэв гарагт БНСУ-ын Олон улсын хамтын ажиллагааны байгууллага (КОЙКА)-ын орлогч дарга Ву Дун Ван, “Улсын бүртгэл, мэдээллийн нэгдсэн системийг сайжруулах цахим архив төсөл”-ийн үнэлгээг хийхээр ирсэн Кёнг Хи Их сургуулийн багш Ким Сан Таэ болон төслийг гүйцэтгэгч SK C&C компанийн ерөнхий менежер, төслийн удирдагч Ян Хи Чол нарыг хүлээн авч уулзав.

Уулзалтын үеэр БНСУ-ын Олон улсын хамтын ажиллагааны байгууллага (КОЙКА)-ын орлогч дарга Ву Дун Ван “Улсын бүртгэл, мэдээллийн нэгдсэн системийг сайжруулах цахим архив төсөл” нь БНСУ, Монгол Улс хоорондын найрамдалт харилцааг улам бататгаж өгсөн, хоёр улсын хамтын ажиллагаанд нэгэн тод жишээ болж үлдэхүйц сайн төсөл байлаа хэмээн онцлон хэлсний дээр төслийн үр дүнд сэтгэл хангалуун байгаагаа илэрхийлсэн юм. УБЕГ-ын дарга Ц.Пүрэвдорж төслийн хэрэгжилтийн явцад тодорхой хүндрэл бэрхшээлүүд гарсан боловч нягт уялдаатай хамтын ажиллагааны дүнд саад бэрхшээлийг шийдэж чадсаныг дурдаж байв. Түүнчлэн “Улсын бүртгэл, мэдээллийн нэгдсэн системийг сайжруулах цахим архив төсөл”-ийг хэрэгжүүлэх саналыг хүлээн авсан БНСУ-ын Засгийн газар, БНСУ-ын Олон улсын хамтын ажиллагааны байгууллага (КОЙКА) болон төслийн гүйцэтгэгч компани болох SK C&C-ийн хамт олонд талархаснаа илэрхийлсэн юм. БНСУ-ын Олон улсын хамтын ажиллагааны байгууллага (КОЙКА)-ын буцалтгүй тусламжийн хөрөнгөөр хэрэгжсэн энэхүү төслийн үр дүнд Улсын бүртгэлийн ерөнхий газар нь Хуулийн этгээдийн бүртгэлийн системээ бүрэн шинэчилж чадсан бөгөөд одоо иргэн, хуулийн этгээдийн цаасан суурьт баримтуудыг тодорхой стандартын дагуу цахим хэлбэрт шилжүүлэх ажил явагдаж байна.