Тус газрын 2012 оны жилийн эцсийн тайлангийн хурал боллоо. Хуралд Улсын бүртгэлийн ерөнхий газрын даргын үүргийг түр орлон гүйцэтгэгч Ц.Пүрэвдорж, тус газрын Тамгын газрын даргын үүргийг түр орлон гүйцэтгэгч Ч.Чанлуулодой, Бүртгэлийн газрын даргын үүргийг түр орлон гүйцэтгэгч Д.Энхцэцэг бусад холбогдох газрын дарга нар болон нийт албан хаагчид оролцлоо.

Хурлын эхэнд Тамгын газрын даргын үүргийг түр орлон гүйцэтгэгч Ч.Чанлуулодой 2012 онд авч хэрэгжүүлсэн арга хэмжээ, ажил үйлчилгээ, бүтээгдэхүүн нийлүүлэлт, тайлангийн талаар танилцуулга мэдээлэл хийж, албан хаагчдын санал бодлыг сонсон хэлэлцүүлэг өрнүүлэв. Улсын бүртгэлийн ерөнхий газар нь 2012 оныг «Улсын бүртгэлийн үйл ажиллагааг цахимжуулах, Монгол Улсын иргэний үнэмлэхийг шинэчлэн олгох» жил болгож, төсвийн ерөнхийлөн захирагчийн эрхлэх асуудлын хүрээний бодлого зорилтыг хэрэгжүүлэх, «Монгол Улсад бүртгэл, мэдээллийн нэгдсэн тогтолцоог бий болгох үндэсний хөтөлбөр», «Монгол Улсын Засгийн газрын 2008-2012 оны үйл ажиллагааны хөтөлбөр», «Монгол Улсын эдийн засаг, нийгмийг 2012 онд хөгжүүлэх үндсэн чиглэл»-д тусгагдсан томоохон арга хэмжээг авч хэрэгжүүлэхээр төлөвлөн ажилласан. Тодруулбал, бүтээгдэхүүн нийлүүлэлтийг хангах 2012 оны үйл ажиллагааны төлөвлөгөөндөө 8 бүтээгдэхүүний ангид 74 арга хэмжээг төлөвлөн хэрэгжүүлсэн нь төлөвлөгөөний биелэлтийг 94,4 хувьтай амжилтай хийж, биелүүлээд байна. 2012 онд хийсэн ажлын талаар тоймлоход Монгол Улсын иргэний шинэчилсэн бүртгэлийн ажлыг үргэлжлүүлж гадаадад байгаа иргэдээ иргэний шинэчилсэн бүртгэлд бүртгэх, иргэний хувийн хэрэгжүүлсэн баримтыг цахим хэлбэрт шилжүүлж, иргэдэд иргэний цахим үнэмлэх олгох, эд хөрөнгийн эрхийн бүртгэлийн болон хуулийн этгээдийн бүртгэлийн архивыг цахимжуулах, улсын бүртгэл мэдээллийн нэгдсэн цахим санг үүсгэх, Улсын Их Хурлын болон орон нутгийн Хурлын сонгуулийн тухай хуулийн хэрэгжилтийг зохион байгуулах, улсын бүртгэлийн эрх зүйн орчинг сайжруулж, салбарын хууль, тогтоомжийн давхардал, хийдэл, зөрчлийг арилгах замаар хуулийг боловсронгуй болгох, улсын бүртгэлийн үйлчилгээг хялбаршуулж боловсронгуй болгох, орон нутгийн бүртгэлийн үйл ажиллагааг бэхжүүлэх зэрэг арга хэмжээг авч хэрэгжүүлсэн байна. Хурлын төгсгөлд тус газрын даргын үүргийг түр орлон гүйцэтгэгч Ц.Пүрэвдорж 2012 он улсын бүртгэлийн байгууллагын хувьд амжилт бүтээлийн өрнүүн жил байсныг онцолж, 2013 онд хийж бүтээх, шинэчлэх ажил их байгааг онцолж, улсын бүртггэлийн байгууллагын нийт албан хаагчдад ажлын амжилт, сайн сайхныг хүслээ.