Тус газар Эд хөрөнгийн эрхийн бүртгэлийн архивыг цахимжуулах ажлыг “Хөрөнгийн эрхийн төсөл”-ийн санхүүжилтээр, Иргэний баримтын архив, Хуулийн этгээдийн бүртгэлийн архивыг цахимжуулах ажлыг «Улсын бүртгэл, мэдээллийн цахим архив» төслийн хүрээнд БНСУ-ын Олон улсын хамтын ажиллагааны байгууллага /КОЙКА/-ын буцалтгүй тусламжийн хөрөнгөөр тус тус хамтран хэрэгжүүлэхээр шийдвэрлэж, холбогдох ажлуудыг эхлүүлээд байгаа билээ.

Энэ хүрээнд БНСУ-ын Олон улсын хамтын ажиллагааны байгууллага КОЙКА-тай хамтран архивын эх материалыг цахим хэлбэрт оруулах, e-Archiving системд мэдээлэл оруулах, удирдах системийг байгуулах, Хуулийн этгээдийн бүртгэлийн системийг шинээр байгуулах, иргэн, хуулийн этгээд, эд хөрөнгийн эрхийн бүртгэлийн системийг нэгтгэсэн портал системийг бий болгох зорилготой “Улсын бүртгэл, мэдээллийн нэгдсэн системийг сайжруулах цахим архив” төслийг хэрэгжүүлэн ажиллаж байна. “Цахим архив” төслийн бэлтгэл ажлын хүрээнд хувийн хэргийн нэгдсэн санд иргэний шинэчилсэн бүртгэлийн маягтыг хүлээн авах, цахим хэлбэрээр бүртгэх, нэрийн эхээр ангилан ялгах, цагаан толгойн үсгийн дараалалаар галиглах, хувийн хэрэгжсэн баримтыг давхар хамгаалалтын цаасан хайрцагт хийх зэрэг тодорхой ажлуудыг хийгээд байна. Мөн уг төслийн хүрээнд судалгааны багтай програм хангамж боловсруулах асуудлаар болон төслийн үе шатны хэрэгжилтийн судалгаа хийхэд хамтран ажиллаж, төлөвлөгөөний дагуу техник, тоног төхөөрөмж, програм хангамжийг турших, нэвтрүүлэх, нийлүүлэгдсэн техник, тоног төхөөрөмжийг хүлээн авах, угсарч суурилуулах, ажлын бэлэн байдалд оруулах ажлыг хэрэгжүүлээд байна. “Хөрөнгийн эрхийн төсөл”-ийн хүрээнд Эд хөрөнгийн эрхийн улсын бүртгэлийн хувийн хэргийг цахимжуулахад бэлтгэх ажил 2012 оны 5 дугаар сарын 10-ны өдөр эхэлсэн бөгөөд Багахангай, Налайх дүүргийн 5013 /152725 хуудас/ хувийн хэргийг цахимжуулахад бэлтгэн бүрэн цахимжуулж дууссан. Одоогийн байдлаар Сүхбаатар дүүргийн эд хөрөнгийн эрхийн бүртгэлийн архивын хувийн хэргийг цахимжуулах ажил үргэлжилж байна. Мөн төсөл хэрэгжиж байгаа бүсийн тулгуур төв Төв, Завхан, Ховд, Хэнтий, Дархан-Уул, Орхон, Өвөрхангай, Дорнод зэрэг 8 аймаг, Багануур дүүргийн Улсын бүртгэлийн хэлтэст төслийн зүгээс цахимжуулах тоног төхөөрөмжийг угсарч суурилуулан Эд хөрөнгийн эрхийн бүртгэлийн архивыг цахимжуулах ажил амжилттай явагдаж байна. Архивын эх материалыг цахим хэлбэрт оруулах ажил 2013 онд үргэлжлэн хийгдэх бөгөөд одоогийн байдлаар уг ажил төлөвлөгөөний дагуу явагдаж байна.