Орон нутгийн сонгууль болоход хоёр хоног үлдээд байна. Тус газраас Аймаг,сум дүүргийн иргэдийн төлөөлөгчдийн хурлын сонгуулийг иргэний цахим үнэмлэхээр явуулахаар бэлтгэл ажил хангаад байна. Иргэд анх удаа цахим иргэнийхээ үнэмлэхээр саналаа өгч сонгуульд оролцох юм.

Иймээс үүнтэй холбогдуулан өнөөдөр Монгол Улсын Ерөний сайд Н.Алтанхуяг Сонгинохайрхан дүүргийн Улсын бүртгэлийн хэлтэст ажиллаж, цахим үнэмлэхийн тараалт дүүргийн хэмжээнд болон улсын хэмжээнд ямар байгаатай танилцлаа. Сонгинохайрхан дүүрэг 257140 хүн амтайгаас сонгуулийн насны 183323 иргэн байна. Өнөөдрийн байдлаар 185862 ширхэг иргэний цахим үнэмлэхийг хэвлэлтээс татан авч, 180597 ширхэгийг нь иргэдэд хүргэсэн байна. Цахим үнэмлэхийн тараалт 97,17 хувьтай байна. Хороодод тараагдаагүй 5265 иргэний цахим үнэмлэх үлдсэн бөгөөд үүний 3805 хүн ямар нэг хүндэтгэх шалтгаантай. Тодруулбал, хаягандаа оршин суудаггүй буюу эзэнгүй 3356, хилийн чанадад ажиллаж амьдарч байгаа 389, хугацаат цэргийн апбанд 29, хорих ангид ял эдэлж байгаа 31 иргэн цахим үнэмлэхээ аваагүй байна. Үлдсэн 1460 иргэний үнэмлэхийг маргааш, нөгөөдөр хороодоор дамжуулан олгох шуурхай арга хэмжээ авч ажиллах болно гэж СХД-ийн Бүртгэлийн хэлтсийн дарга Р.Салдатхан танилцууллаа. Тус дүүрэг 32 хороо, 62820 өрхтэй. Дүүргийн сонгуулийн 80 хэсгийн хороонд бүртгэлийн байгууллагын 157 итгэмжлэгдсэн ажилтан сонгуулийн өдөр ажиллах юм. Итгэмжлэгдсэн ажилтнуудыг сургалтад 100 хувь хамруулж, сонгогчийн нэрийн жагсаалт, мэдээлэл бүхий компьютеруудыг сонгуулийн 80 хэсгийн хороонд бүрэн хүлээлгэн өгчээ. Энэ үеэр Улсын бүртгэлийн ерөнхий газрын дарга Ц.Пүрэвдорж 11 дүгээр сарын 19-ний байдлаар нийт сонгуулийн насны иргэдийн 1.815.596 иргэн цахим үнэмлэхээ авсан нь улсын хэмжээнд 97.5 хувьтай байна. Үүнээс нийслэлд 791.140 иргэн буюу 96.4 хувьтай байгаа бол орон нутагт 1.024.596 иргэн буюу 98.5 хувь нь цахим үнэмлэхээ аваад байгааг хэллээ.Ерөнхий сайд сүүлийн өдрүүдэд хэвлэл мэдээллийн хэрэгслээр элдэв янзын шүүмж гарсаныг онцолж, иргэдийг төөрөгдүүлж болох ийм асуудлуудад албан ёсны тайлбар өгөх, мөн сэтгүүлчдээс иргэний цахим үнэмлэхтэй холбоотой ойлгомжгүй асуудлууд байвал албаны хүмүүсээс тодруулахыг хүссэн. Тус газрын дарга хэлэхдээ иргэд болон улс төрийн нам, эвслээс өнөөдрийн байдлаар цахим үнэмлэхтэй холбоотой асуудлаар ямар нэг гомдол, санал ирээгүй байна гэсэн. Харин иргэний үнэмлэх дээрх зураг шаардлага хангахгүй байна, солиулах хүсэлтэй байгаагаа илэрхийлсэн иргэд нилээдгүй байна. Тиймээс зураг солиулах хүсэлтэй иргэд орон нутгийн сонгуулийн дараа өөрийн оршин суугаа хороо, сумынхаа иргэний бүртгэлийн ажилтанд хүсэлтээ гаргаад солиулах боломжтойг хэлэв.Иргэд, сонгогчийн сонгох эрхийг хязгаарлахгүй байхын тулд сонгуулийн өдрийг хүртэл бус сонгуулийн өдөр ч цахим үнэмлэхийг дүүрэг, хороогоор нь дамжуулан иргэдэд олгох ажлыг зохион байгуулахыг Ерөнхий сайд тус газрын удирдлагуудад үүрэг болголоо.