Улсын бүртгэлийн ерөнхий газраас иргэний цахим үнэмлэхий олголтыг эрчимжүүлэх ажлын хүрээнд төв, орон нутгийн хэмжээнд Бямба гариг бүр ажиллаж иргэдэд цахим үнэмлэх олгож байгаа билээ.

Мөн үүнтэй холбогдуулан аймаг, сум, хорооны засаг даргаар ахлуулсан ажлын хэсгийн баг бүрэлдэхүүн болон бүртгэлийн ажилтнууд цахим үнэмлэхээ биечлэн авах боломжгүй иргэдэд гэрээр цахим үнэмлэхийг нь олгож байна. Цахим үнэмлэхийн олголттой холбогдуулан Улсын бүртгэлийн ерөнхий газар аймаг, нийслэлээс долоо хоног тутам тайлан мэдээ авч нэгтгэж байгаа. Тэгвэл 11 дүгээр сарын 08-ны өдрийн байдлаар иргэний цахим үнэмлэхийн явц улсын хэмжээнд 95,3 хувьтай буюу 1.784.277 иргэн цахим үнэмлэхээ аваад байна. Үүнээс нийслэлд 94,9 хувь буюу 779.787 иргэн цахим үнэмлэхээ аваад байгаа бол хөдөө орон нутагт 1.449.000 иргэн цахим үнэмлэхээ авсан нь 95,7 хувьтай байна. Иргэний цахим үнэмлэхийн олголт нийслэлийн 9 дүүрэг, 19 аймагт 95-аас дээш хувьтай байна. Харин Баян-Өлгий, Өвөрхангай аймагт цахим үнэмлэхийн олголт тааруу байгаа юм. Иймээс үүнтэй холбогдуулан УБЕГ-ын холбогдох дарга нар тус аймгуудад ажиллаж байна.