Монгол Улсын Ерөнхий сайд Н.Алтанхуяг өнөөдөр Улсын бүртгэлийн ерөнхий газрын ажилтай танилцаж, иргэний цахим үнэмлэхтэй холбоотой асуудлаар тодруулга хийлээ.

Ирэх сард зохион байгуулагдах орон нутгийн сонгуулийг Монгол Улсын иргэн цахим үнэмлэхээр санал өгнө. Өнөөдрийн байдлаар 1,546,698 цахим үнэмлэх буюу 85 хувь нь бүртгэлийн нэгжүүдээр дамжин иргэдийн гарт олгогдоод байгаа талаар тус газрын Бүртгэлийн газрын дарга Д.Энхцэцэг Монгол Улсын Ерөнхий сайдад танилцууллаа. Мөн энэ үеэр Улсын бүртгэлийн ерөнхий газрын дарга Ц.Пүрэвдорж орон нутгийн сонгуулийн тухай хуулийг хэрэгжүүлэх хүрээнд хийж буй ажил, авч хэрэгжүүлж буй арга хэмжээний талаар танилцуулга хийсэн бол тус газрын Бүртгэлийн газрын дарга Ерөнхий сайдад иргэний цахим үнэмлэхтэй холбоотой иргэдээс ирсэн нийтлэг асуултанд хариулт, тодруулга өгсөн юм. Улсын хэмжээнд Ховд, Өмнөговь аймгууд болон Налайх, Баянгол дүүргийн сонгуулийн насны иргэдийн 90-ээс дээш хувь нь цахим үнэмлэхээ аваад байна. Харин Өвөрхангай , Баян-Өлгий, Говьсүмбэр аймгууд 80-аас доош хувьтай байгаа юм. Иймээс Ерөнхий сайд 80-аас доош хувьтай байгаа аймаг, дүүргүүдэд онцгой анхаарч, үнэмлэх тараах ажлыг эрчимжүүлэхийг тус газрын удирдлагуудад үүрэг болголоо.