Хууль зүйн дэд сайд Э.Эрдэнэжамъяан өнөөдөр Улсын бүртгэлийн ерөнхий газрын үйл ажиллагаа болон иргэний цахим үнэмлэх олголт, орон нутгийн сонгуулийн тухай хуулийг хэрэгжүүлэх хүрээнд хийж буй ажлын явцтай танилцлаа.

Одоогоор Монгол Улсын 1,6 сая иргэн цахим үнэмлэхээ аваад байгаа. Бичиг баримт болон хаягийн зөрчилтэй 30 мянган иргэний зөрчлийг арилгаж, энэ долоо хоногтоо цахим үнэмлэхийг нь олгоно. Цаана нь бичиг баримт, хаягийн зөрчилтэй 20 мянган иргэн үлдэх юм байна. Улсын бүртгэлийн ерөнхий газраас 2009 онд цахим үнэмлэхийн төсөл бичээд Азийн сан, ЖАЙКА, КОЙКА зэрэг олон улсын байгууллагад ханджээ. Тус газрын саналыг Солонгосын КОЙКА нааштай хүлээн авч, программ хангамж, тоног төхөөрөмжөөр хангахаар 4000 ам.долларын буцалтгүй тусламж үзүүлэхээр болсон гэдгийг тус байгууллагын дарга дэд сайдад танилцуулав. Ингэснээр Монгол Улсын иргэний бүртгэлийн 15 сая цаасыг цахимжуулж, нэгдсэн нэг системтэй болох юм. Одоогийн байдлаар архивыг цахимжуулахаар үндсэн 24, гэрээтээр 100 гаруй ажилтан ажиллаж байна. Мөн дэд сайд Чингэлтэй дүүргийн бүртгэлийн газрын үйл ажиллагаатай танилцсан юм. Тус дүүрэгт одоогоор цахим үнэмлэхийн тараалт 89,5 хувьтай явж байгаа. 10109 хүн цахим үнэмлэхээ аваагүй байгаа тул дүүргийн Засаг даргын Тамгын газартай хамтран “Болзолт уралдаан” зарлаж, тараалтын ажлыг эрчимжүүлэх гэж байгаа гэдгийг тус дүүргийн Улсын бүртгэлийн хэлтсийн даргын үүргийг түр орлон гүйцэтгэгч Н.Пүрэвжаргал ярьж байлаа. Түүнчлэн архивын өрөө нь чиг дааж, мөөгөнцөрдсөн, иргэдийн баримт бичгийг хадгалах, хүн ажиллах нөхцөлгүй, байр савны хүрэлцээ муу байгааг онцолсон юм.