Улсын бүртгэлийн ерөнхий газраас Аймаг, сум, дүүргийн Иргэдийн Төлөөлөгчдийн Хурлын сонгуулийн тухай хуулийг хэрэгжүүлэх ажлын хүрээнд орон нутаг дахь Улсын бүртгэлийн газар, хэлтсийн дарга, Иргэний бүртгэлийн тасгийн дарга нарыг хамруулсан “Аймаг, сум, дүүргийн иргэдийн Төлөөлөгчдийн Хурлын сонгуулийн тухай хуулийг хэрэгжүүлэхэд Улсын бүртгэлийн байгууллагын оролцоо” сэдэвт сургалт Улаанбаатар хотноо хоёр өдрийн турш амжилттай явагдаж өндөрлөв.

Сургалтаар сонгуулийн хуулийг хэрэгжүүлэхэд бүртгэлийн байгууллагын оролцоо, тулгамдаж буй асуудал, цаашид авч хэрэгжүүлэх арга хэмжээ, мэдээллийн сан, програм хангамж, түүнийг хэрхэн хэрэглэх, аюулгүй ажиллагааны талаар болон иргэний цахим үнэмлэхийн түгээлтийн явц зэрэгтэй холбоотой цаг үеийн тулгамдсан чухал сэдвүүдийн хүрээнд Улсын бүртгэлийн ерөнхий газрын зарим газар, хэлтсийн дарга, мэргэжилтнүүд илтгэл тавьсан. Мөн энэ үеэр орон нутгийн болон дүүргийн Улсын бүртгэлийн хэлтэс, тасгийн дарга нар бүртгэлийн байгууллагын өнөөгийн болон цаашдын зорилт, чиг үүрэг, үйл ажиллагаа хийгээд энэхүү хуулийг хэрэгжүүлэх ажлын хүрээнд юу хийх талаар санал бодлоо солилцож, хэлэлцүүлэг өрнүүлсэн юм. Уг сургалтад аймаг, нийслэл дүүргийн хэлтэс, тасгийн дарга нараас гадна тус газрын холбогдох албан хаагчид нийт 60 гаруй хүмүүс хамрагдлаа.