Аймаг,сум, дүүргийн иргэдийн Төлөөлөгчдийн хурлын сонгуулийн тухай хуулийн 19 дүгээр зүйлийн 3 дахь хэсэгт “Сонгогчдын нэрийн жагсаалтыг энэ хуулийн 12.1-д заасны дагуу байгуулагдсан хэсэг тус бүрээр үйлдэх бөгөөд уг жагсаалтыг санал авах өдрөөс 50-аас доошгүй хоногийн өмнө эхлэн санал авах өдөр хүртэл Улсын бүртгэлийн асуудал эрхэлсэн төрийн захиргааны төв байгууллага өөрийн цахим хуудаст байрлуулна”

гэж заасны дагуу сонгуулийн насны иргэдийн мэдээллийг өөрийн байгууллагын https://songuuli.burtgel.mn цахим хуудсанд байршуулж, иргэн бүрийг сонгогчдын нэрийн жагсаалт дахь өөрийн мэдээлэлтэй танилцах боломжоор хангалаа. Иймд иргэн бүр дээрх цахим хуудсанд хандаж “Аймаг, сум, дүүргийн иргэдийн Төлөөлөгчдийн хурлын сонгуулийн сонгогчдын нэрийн жагсаалт” гэсэн цонхыг сонгон улмаар зөвхөн өөрт холбогдох мэдээлэлтэй танилцаж зөрчилгүй бол “баталгаажуулах” хэсгийг дарж өөрийн мэдээллийн үнэн зөвөө баталгаажуулах юм. Харин өөрийн мэдээллээ шалгах явцад ямар нэгэн мэдээллийн зөрүү илэрсэн бол “алдааг мэдээлэх” хэсгийг сонгож харъяа аймаг, сум, дүүргийн уг ажлыг шууд хариуцан ажиллаж байгаа иргэний бүртгэлийн ажилтнуудтай утсаар холбогдох боломжтой. Хэрэв шаардлагатай бол Улсын бүртгэлийн ерөнхий газрын Бүртгэлийн газрын 263450 болон бүртгэлийн нэгдсэн лавлах 1890 утсанд хандахыг зөвлөж байна.