Улсын бүртгэлийн ерөнхий газраас Их хурлын сонгуулийн өмнө иргэний үнэмлэхээ хаяж, үрэгдүүлсэн, хүчингүй болгосны улмаас иргэний үнэмлэхийн зурагтай лавлагааг авсан сонгуулийн насны 132 мянган иргэний цахим үнэмлэхийг хэвлэн харьяа аймаг, дүүргийн Улсын бүртгэлийн хэлтсүүдэд хүлээлгэн өгч, олгох ажлыг зохион байгуулсан билээ.

Тэгвэл үүний дараа 7 дугаар сарын эхээр цахим иргэний үнэмлэх хэвлэх, түгээх олгох ажил эхэлсэнтэй холбогдуулан одоогийн байдлаар Говь-Алтай, Дундговь, Говь-Сүмбэр, Хэнтий, Дорноговь, Дархан-Уул, Өмнөговь, Завхан, Ховд, Увс, Дорнод, Төв, Хөвсгөл, Баянхонгор, Булган, Завхан, Орхон, Сүхбаатар аймгийн цахим үнэмлэхийг хэвлэж дуусгасан бол Нийслэлээс Баянзүрх, Баянгол дүүргийг хэвлэж дуусгаад байна. Хэвлэлтийн хувьд эхлээд хаягийн шилжилт хөдөлгөөн бага байдаг орон нутгаас эхэлж байгаа бөгөөд нийслэлийн иргэдийн цахим үнэмлэхийг түүний дараагаар хэвлэлтэнд оруулах төлөвлөгөөтэй байна. Харин түгээлт, олголтийн хувьд орон нутгуудын аймгуудад бүсчилсэн маршут гарган хүргэхээр бэлтгээд байна. Энэ дагуу өнөөдрийн байдлаар дээрх хэвлэсэн аймаг, дүүргийн иргэдийн цахим үнэмлэхийг хүргүүлээд байгаа бөгөөд Говь-Алтай, Дундговь, Говь-Сүмбэр, Хэнтий, Дорноговь, Өмнөговь, Завхан, Ховд, Увс, Дорнод, Сүхбаатар, Төв аймгууд сумддаа хүргүүлсэн байна. Одоогийн байдлаар Дархан-Уул аймаг, нийслэлийн Сонгинохайрхан дүүргийн иргэдийн иргэний цахим үнэмлэхийг хэвлэх ажил явагдаж байна. Орон нутгийн иргэдийн цахим үнэмлэхийг хэвлэх хугацаанд хаягын шилжилт хөдөлгөөн ихтэй байдаг Нийслэлчүүд шилжилтээ хийлгэх бүрэн боломжтой юм. Мөн цахим үнэмлэх хуучин хаягаар хэвлэгдсэн тохилдолд бэлдэц дээр нэмэлт тэмдэглэгээ хийхгүй бөгөөд дахин шинээр хураамжаа төлөн шинэчлүүлэн авах юм. Орон нутгийн иргэдийн иргэний үнэмлэхийг 2012 оны 9 дүгээр сарын 25-ны өдөр, нийслэлийн иргэдийн иргэний үнэмлэхийг 2012 оны 10 дугаар сарын 1-ний өдөр хэвлэж дуусгах бөгөөд 10 дугаар сарын 10-ны өдрийн дотор буюу аймаг, нийслэл, сум, дүүргийн иргэдийн төлөөлөгчдийн хурлын төлөөлөгчдийг сонгох 2012 оны сонгуулиас өмнө Монгол Улсын иргэн бүрийг цахим үнэмлэхжүүлэх ажлыг тус газар хуваарийн дагуу хийж байна. Харин аймаг, нийслэлийн иргэдийн цахим үнэмлэхийг хэвлэх үед ямар нэгэн алдаанаас болж хэвлэгдээгүй үлдсэн иргэдийн цахим үнэмлэхийг нягтлан шалгаж, иргэний бүртгэлийн зөрчилийн улмаас хэвлэгдээгүй үнэмлэхийг хэвлэж, олгох ажиллагааг энэ оны 10 дугаар сарын 10-ны өдрөөс хойш 14 хоногт багтаан дуусгахаар төлөвлөж байна.