Тус газрын гадаадад зорчих эрхийн бүртгэлийн хэлтэс жил бүрийн 7 дугаар сараас 9 дүгээр сарын хугацаанд гадаад паспорт шинээр авах, сунгах хүмүүсийн хөлд дарагддаг. Энэ жилийн тухайд өмнөх жилүүдийнхээс илүү ачаалалтай байна.

Энэ нь оюутан залуус гадаадад ихээр суралцах болсон, бага насны хүүхдүүдэд гадаад паспорт олгох шинэ дүрэм гарсан зэрэгтэй холбоотой. Мөн амралт зугаалга, аялал жуулчлалын улирал эхэлсэний зэрэгцээ намар болж сургууль, цэцэрлэгийн үйл ажиллагаа эхэлж иргэд арилжаа наймаанд явах, сургууль соёлоо бараадах үе ирдэгтэй холбоотойгоор давхар ачааллыг үүсгээд байна. Тус хэлтэст өнөөдрийн байдлаар өдөрт нийт 2000 орчим иргэн хандаж байгаагаас шинээр гадаад паспорт авах иргэн 1500 орчим, гадаад паспортын хугацааны сунгалт хийлгэх 500 орчим иргэн үйлчлүүлж байна. Энэ нь энгийн үетэй харьцуулбал үйлчилгээний ачаалал 3-4 дахин нэмэгдээд байгаа юм. Тус газраас ачааллыг бууруулахын тулд 6 цонхоор үйлчилгээ авдаг байсныг нэмж одоогийн байдлаар нийт 10 цонхоор иргэдэд үйлчилж, зарим дүүргээс ажилтан нэмж ажилуулах зэрэг зохион байгуулалтын арга хэмжээ авч ажиллаж байна. Дээрх ачаалал ирэх есдүгээр сараас эхлэн хэвийн горимдоо орно.