Иргэний үнэмлэхийн лавлагааг 6 дугаар сарын 1-ний өдрөөр тасалбар болгоод байсныг "Монгол Улсын Иргэний үнэмлэх олгох ажлыг улсын хэмжээнд зохион байгуулах, нэгдсэн удирдлага чиглэлээр хангах ажлын хэсэг" хуралдан, дахин олгохоор шийдвэрлэв.

Иргэний үнэмлэхийн лавлагаа өгөхийг зогсоосноос хойш иргэний үнэмлэхээ хаяж үрэгдүүлсэн иргэд банк санхүүгийн болон даатгал, халамжийн байгууллага бусад төрийн захиргааны байгууллагуудаар үйлчлүүлэх боломжгүй болоод байсан юм. Иймд 6 дугаар сарын 1-нээс хойш үнэмлэхээ хаяж үрэгдүүлсэн иргэдэд лавлагааг үргэлжлүүлэн олгох эсэх асуудлыг “Монгол Улсын Иргэний үнэмлэх олгох ажлыг улсын хэмжээнд зохион байгуулах, нэгдсэн удирдлага чиглэлээр хангах ажлын хэсэг”-ийн энэ сарын 13-ны өдрийн хуралдаанаар авч хэлэлцсэн. Уг хурлаас лавлагааг үргэлжлүүлэн олгох чиглэлийг тус газарт өгсөний дагуу энэ сарын 14-ний өдрөөс эхлэн иргэдэд олгож эхэллээ.