Монгол Улсын Их Хурлын сонгуулийн тухай хуулийг хэрэгжүүлэх ажлын хүрээнд Улсын бүртгэлийн ерөнхий газраас сонгуулийн насны иргэдийн сонгуульд оролцох эрхийг бүрэн хангах зорилгоор иргэний үнэмлэхээ хаяж үрэгдүүлсэн, хүчингүй болгосон, шинээр авахаар хүсэлт гаргасан сонгуулийн насны иргэнд иргэний шинэчилсэн цахим үнэмлэхийг хэвлэж олгох ажлыг зохион байгуулан ажиллаж байна.

Монгол Улсын Их Хурлын 2012 оны 5 дугаар сарын 18-ны өдрийн “Иргэний бүртгэл, мэдээллийн улсын сангийн мэдээллийг ашиглах, иргэний үнэмлэхийн талаар авах зарим арга хэмжээний тухай” 36 дугаар тогтоолыг хэрэгжүүлэх ажлын хүрээнд 2011 оны 12 дугаар сарын 26-ны өдрөөс 2012 оны 5 дугаар сарын 1-ний өдрийн хооронд иргэний үнэмлэхийн зурагтай лавлагаа авсан 64940 иргэнээс сонгуулийн насны 40091 /Улаанбаатар хотын хэмжээнд 27585, орон нутагт 12506 / иргэний иргэний цахим үнэмлэхийг хэвлэн аймаг, дүүргийн Улсын бүртгэлийн хэлтсүүдэд энэ оны 5 дугаар сарын 29-ны өдөр хүлээлгэн өгч иргэдэд олгож ажлыг эхлүүлээд байна. Харин 2012 оны 5 дугаар сарын 1-ний өдрөөс 6 дугаар сарын 1-ний өдрийн хооронд иргэний үнэмлэхийн лавлагааг сонгуулийн насны 56387 иргэн авсанаас 44586 /Улаанбаатар хотын хэмжээнд 33798, орон нутгийн хэмжээнд 10788/ иргэний иргэний цахим үнэмлэхийг 6 дугаар сарын 10-ний өдрийн дотор хэвлэж, 6 дугаар сарын 15-ны өдрийн дотор харьяа аймаг, дүүргийн улсын бүртгэлийн хэлтсүүдэд хүргүүлж, 25-ны өдрийг хүртэл иргэдэд олгож дуусгахаар төлөвлөн ажиллаж байна. Гэтэл Улсын бүртгэлийн ерөнхий газар 28000 ширхэг цахим үнэмлэхийг хуурамчаар хэвлэсэн мөн Нийслэлийн Баянзүрх дүүрэгт 21000 сонгогчийг сонгогчийн нэрийн жагсаалтаас хасаж, 14000 сонгогчийг нэмж бүртгэсэн мэтээр ташаа мэдээллийг санаатайгаар буюу санамсаргүйгээр иргэд олон нийтэд өгч байгааг эрс эсэргүүцэж албан ёсоор няцаалт өгч байна. Баянзүрх дүүрэгт л гэхэд Улсын бүртгэлийн ерөнхий газар Ардчилсан талын 21000 сонгогчийг нэрийн жагсаалтаас хасаж, Ардын намыг дэмждэг 14000 сонгогчийг нэмж бүртгэсэн гэж ИЗНН-аас өгсөн гэх мэдээллийг Улсын бүртгэлийн газраас шалгаж үзэхэд уг мэдээлэл огт ор үндэсгүй болох нь тогтоогдлоо. Улсын бүртгэлийн ерөнхий газар нь үйл ажиллагаагаа хууль тогтоомжийн хүрээнд нээлттэй явуулж байгаа бөгөөд Монгол Улсын Их Хурлын сонгуулийн тухай хууль, холбогдох бусад хууль тогтоомжийг чанд мөрдөн ажиллаж, хэвлэл мэдээллийн байгууллагатай ил тод хамтран ажиллахад бэлэн байгааг хариуцлагатайгаар мэдэгдэж байна.

УЛСЫН БҮРТГЭЛИЙН ЕРӨНХИЙ ГАЗАР