Тус газраас өнөөдөр иргэний үнэмлэхийн лавлагаа авсан иргэдийн цахим үнэмлэхийг хэвлэн тарааж эхэлсэнтэй холбогдуулан сэтгүүлчдэд мэдээлэл хийлээ. Монгол Улсын Засгийн газрын 338, 329 дүгээр тогтоолыг үндэслэн Улсын бүртгэлийн ерөнхий газраас 2011 оны 12 дугаар сарын 26-ны өдрөөр Монгол Улсын Иргэний үнэмлэх /1999 оны/ -ийн хэвлэлт, олголтын ажлыг тасалбар болгон улсын хэмжээнд албан ёсоор зогсоосонтой холбогдуулан Улсын бүртгэлийн ерөнхий газар, түүний орон нутаг дахь салбар, нэгжээс иргэний үнэмлэхийн зурагтай лавлагааг олгож эхэлсэн билээ.
Иргэний үнэмлэхээ хаяж үрэгдүүлсэн болон хүчингүй болгосон зэрэг шалтгаанаар иргэний үнэмлэхийн лавлагаа авсан сонгуулийн насны иргэдийг сонгуульд оролцуулах эрхийг нь хангахтай холбогдуулан Монгол Улсын Их Хурлын 2012 оны 5 дугаар сарын 18-ны өдрийн “Иргэний бүртгэл, мэдээллийн улсын сангийн мэдээллийг ашиглах, иргэний үнэмлэхийн талаар авах зарим арга хэмжээний тухай” 36 дугаар тогтоол батлагдсан. Дээрх тогтоолоор Монгол Улсын Их хурлын болон Нийслэлийн иргэдийн Төлөөлөгчдийн хурлын 2012 оны ээлжит санал хураалтад Засгийн газрын 1999 оны 167 дугаар тогтоолоор баталсан загвар, тодорхойлолт бүхий иргэний үнэмлэхийг ашиглахаар мөн тогтоолын 3-т заасан тохиолдолд олгосон иргэний цахим үнэмлэхийг ашиглахаар тогтсон. Мөн тогтоолын 2 дахь хэсэгт Монгол Улсын Их хурлын болон Нийслэлийн иргэдийн Төлөөлөгчдийн Хурлын 2012 оны ээлжит сонгуульд иргэний бүртгэл, мэдээллийн улсын сангийн мэдээлэл болон иргэний биеийн давхцахгүй өгөгдөл /гарын хурууны хээ/-ийг ашиглан сонгогчийг таньж, шалгах ажиллагааг зохион байгуулахыг Засгийн газарт үүрэг болгосон. Иргэний үнэмлэхээ хаяж үрэгдүүлсэн, хүчингүй болгосон, шинээр авахаар хүсэлт гаргасан Монгол Улсын сонгуулийн насны иргэнд иргэний шинэчилсэн цахим үнэмлэхийг хэвлэж, тараах ажлыг зохион байгуулахыг тогтоолын 3 дахь хэсэгт даалгасан. УИХ-ын 2012 оны 36 дугаар тогтоолыг хэрэгжүүлэх ажлын хүрээнд УБЕГ-аас иргэний үнэмлэхээ хаяж, үрэгдүүлсэн, хүчингүй болгосны улмаас иргэний үнэмлэхийн зурагтай лавлагааг 2011 оны 12 дугаар сарын 26-ны өдрөөс 2012 оны 5 дугаар сарын 1-ний өдрийн хооронд авсан сонгуулийн насны 38183 /Улаанбаатар хотын хэмжээнд 25677, орон нутагт 12506 / иргэний иргэний цахим үнэмлэхийг хэвлэн аймаг, дүүргийн Улсын бүртгэлийн хэлтсүүдэд засаг захиргааны харьяаллынх нь дагуу энэ оны 5 дугаар сарын 29-ны өдөр хүлээлгэн өгөөд байна. Энэ хугацаанд иргэний үнэмлэхийн лавлагаа авсан иргэд харьяа аймаг, дүүргийн Улсын бүртгэлийн хэлтэст хандан иргэний цахим үнэмлэхээ авах боломжтой болсон. Харин 5 дугаар сарын 1-ний өдрөөс 6 дугаар сарын 1-ний өдрийн хооронд иргэний үнэмлэхийн лавлагаа авсан сонгуулийн насны 56387 иргэний иргэний цахим үнэмлэхийг 6 дугаар сарын 10-ний өдрийн дотор хэвлэж дуусган, энэ сарын 15-ны өдрийн дотор харьяа аймаг, дүүргийн улсын бүртгэлийн хэлтсүүдэд хүргүүлж, 25-ны өдрийг хүртэл иргэдэд олгож дуусгахаар төлөвлөн ажиллаж байна. Иргэний үнэмлэхээ хаяж үрэгдүүлсэн болон хүчингүй болгосны улмаас иргэний үнэмлэхийн лавлагаа авсан иргэдийн иргэний цахим үнэмлэхийг хэвлэж улмаар түүнийг орон нутагт хүргүүлж, иргэнд олгож, түгээх хугацааг тооцон үзсэний үндсэн дээр сонгуулийн насны иргэдэд олгох иргэний үнэмлэхийн лавлагааг 6 дугаар сарын 1-ний өдрөөр тасалбар болгосон. Харин их дээд сургуулийн элсэлтийн шалгалт эхэлж байгаатай холбогдуулан 16, 17 насны иргэдэд иргэний үнэмлэхийн лавлагааг Улсын бүртгэлийн ерөнхий газрын Иргэний баримтын төв архивын хэлтэс, Нийслэлийн Улсын бүртгэлийн газар, 21 аймгийн Улсын бүртгэлийн хэлтсээс урьдын адил олгож байгаа болно. Монгол Улсын Засгийн газрын 1999 оны 167 дугаар тогтоолоор батлагдсан загвар, тодорхойлолт бүхий иргэний үнэмлэхтэй иргэдийн цахим үнэмлэхийг хэвлэх ажлыг 2012 оны 7 дугаар сарын 02-ны өдрөөс эхлэн хэвлэж, иргэдэд олгож түгээх ажлыг зохион байгуулна. УИХ-ын энэ оны 5 дугаар сарын 18-ны өдрийн Улсын тэмдэгтийн хураамжаас чөлөөлөх тухай хуульд өөрчлөлт оруулах тухай хууль болон Монгол Улсын Засгийн газрын 2012 оны 5 дугаар сарын 9-ны өдрийн “Тогтоолд өөрчлөлт оруулах тухай” 160 дугаар тогтоолоор энэ оны 12 дугаар сарын 31-ны өдрийг хүртэлх хугацаанд Монгол Улсын иргэн иргэний цахим үнэмлэх эхний удаа авахад улсын тэмдэгтийн хураамж, үйлчилгээний хөлснөөс 1 удаа чөлөөлөх тухай, шийдвэр гарсан. Иймээс иргэний цахим үнэмлэхийг иргэдэд энэ оныг дуустал нэг удаа үнэ төлбөргүй олгох юм.
