Улсын бүртгэлий ерөнхий газар төрийн үйлчилгээг иргэдэд ойртуулж, үйлчилгээний ачааллыг саармагжуулж, хүртээмжийг сайжруулах зорилгоор Эд хөрөнгийн эрхийн бүртгэлийн газрын Баянгол, Баянзүрх, Сонгинохайрхан дүүргийн үйлчилгээг тухайн дүүргийн Иргэний бүртгэлийн тасагт шилжүүлээд байна.

Иимээс дээрх дүүргийн иргэд өөрийн оршин суугаа харьяалалын дагуу эд хөрөнгийн эрхийн бүртгэлтэй холбоотой бүхий л төрлийн үйлчилгээг нэг цэгээс авах боломж бүрдэж байна. Өмнө нь иргэн эд хөрөнгийн бүртгэлтэй холбоотой өөрт хэрэгтэй үйлчилгээг авахын тулд ерөнхий газрыг /100айл / зорих зайлшгүй шаардлагатай байсан бол энэ сараас эхлэн замын түгжрэл, оочер дараалалд бухимдалгүй, ажлын цаг заваа бодитой хэмнэж төрийн үйлчилгээг илүү хүртээмжтэй, шуурхай авах боломжийг бий болголоо. Эд хөрөнгийн эрхийн бүртгэлийн газар өдөрт нийт 1300 гаруй иргэн үйлчлүүлдэгээс өнөөдрийн байдлаар архивын чиглэлээр дунджаар 400 иргэний лавлагааны мэдүүлгийн хуудас, эд хөрөнгийн эрхийн бүртгэлтэй холбоотой бүхий л төрлийн мэдүүлгийн хуудас 800 орчмыг хүлээн авч үйлчилж байна. Баянгол, Баянзүрх, Сонгинохайрхан дүүргийн тухайд хүм ам ихтэй бөгөөд эд хөрөнгийн эрхийн бүртгэлийн газраар үйлчлүүлж байгаа нийт иргэдийн 60 орчим хувийг тус дүүргүүд эзэлдэг. Баянгол, Баянзүрх, Сонгинохайрхан дүүргийн Иргэний бүртгэлийн тасагт шилжүүлснээр Улсын бүртгэлийн ерөнхий газрын Эд хөрөнгийн эрхийн бүртгэлийн газраар өдөрт үйлчлүүлдэг иргэний тоо 60 хувиар буурах юм. Нийслэлийн дүүргийн иргэд дан ганц Иргэний бүртгэлийн үйлчилгээг оршин суугаа газраасаа шуурхай авдаг байсан бол одооноос эд хөрөнгийн бүртгэлийн бүхий л үйлчилгээг нэг дороос авах болсон нь ихээхэн ач холбогдолтой. Улсын бүртгэлийн ерөнхий газраас цаашид бүртгэлийн тэр дундаа гадаад паспортын үйлчилгээг иргэдэд илүү ойроос шуурхай хүргэхээр зорьж мөн адил иргэдийг оршин суугаа газраасаа гадаад паспорт захиалан авах боломжийг бий болгохоор төлөвлөн ажиллаж байна.