Монгол Улсын иргэний цахим үнэмлэх олгох ажлыг улсын хэмжээнд зохион байгуулах, нэгдсэн удирдлага, чиглэлээр хангах ажлын хэсгийг ХЗДХ-ийн сайд Ц.Нямдоржоор ахлуулан байгуулсан билээ.

Уг ажлын хэсгийн анхны хуралдаан өчигдөр болж, иргэний үнэмлэх хэвлэх, түгээх, тараах, мэдээлэл ирүүлэх ажлын хуваарийг баталж, шаардлагатай төсөв хөрөнгийг баталсан байна. Иргэний цахим үнэмлэх хэвлэх, олгох ажлын төлөвлөгөөний талаар өнөөдөр Улсын бүртгэлийн ерөнхий газрын дарга Л.Амарсанаа болон албаны зарим хүмүүс сэтгүүлчдэд мэдээлэл хийв. Монгол Улсын иргэний цахим үнэмлэхийг иргэний шинэчилсэн бүртгэлийн мэдээлэлд суурилан 498 бүртгэлийн анхан шатны нэгжээр дамжуулан Монгол Улсын иргэн бүрт шууд олгох аж. Ирэх дөрөвдүгээр сарын 6-ны өдөр Францаас эхний 60 мянган бэлдэц ирснээр иргэний цахим үнэмлэхийг хэвлэх ажил албан ёсоор эхлэх бөгөөд хэвлэлтээс гарсан багц үнэмлэхийг нэн тэргүүнд алслагдсан аймгуудад хүргэх бөгөөд төлөвлөгөөний дагуу эхний ээлжинд Дорнод, Увс, Баян-Өлгий, Завхан, Ховд зэрэг аймаг дарааллын дагуу иргэний цахим үнэмлэхээ хүлээж авах юм. Франц улсаас долоо хоног тутамд үнэмлэхийн бэлдэц ирэх бөгөөд түүнийг хоёр машинаар хэвлэнэ. Өнгөрсөн оны арванхоёрдугаар сард АНУ-ын “Датакарт” компанийн иргэний үнэмлэх хэвлэх “МХ 6000ТМ” маркын хоёр машиныг холбогдох нууцлалын төхөөрөмж, програм хангамжийн хамт оруулж иржээ. Нэг хэвлэх машин хоногт 21 цаг буюу 75600 секунд ажиллана, нэг иргэний үнэмлэхийг 3.5 секундэд хэвлэнэ гэж тооцоход нэг машин хоногт 21600 ширхэг, хоёр машин хоногт 43200 ширхэг иргэний үнэмлэх хэвлэхээр орон нутгийн иргэний үнэмлэх хэвлэх хуваарийг тус тус тооцож гаргаад байгаа билээ. Улсын хэмжээнд нийт сая 990 мянган цахим үнэмлэх хэвлэх бөгөөд үнэмлэхийг дөрөвдүгээр сарын 6-наас зургадугаар сарын 9-ний өдрийг дуусталх хугацаанд бүрэн хэвлэж дуусгахаар төлөвлөөд байна. Ийнхүү хэвлэгдэж бэлэн болсон иргэний үнэмлэхийг нислэг үйлддэг есөн аймгийн Улсын бүртгэлийн хэлтэст онгоцоор хүргүүлэхийн зэрэгцээ хэвлэгдсэн иргэний үнэмлэхийг нэг ч хоног саатуулахгүйгээр түгээх ажлыг орон нутгийн нэгжид чиглэл өгч, нислэг үйлддэг компаниудтай хамтран ажиллах гэрээ хийж, зохион байгуулж ажиллах юм.