100 мянган айлын орон сууц хөтөлбөртэй холбогдуулан тус газрын Эд хөрөнгийн эрхийн бүртгэлийн газрын архивын ачаалал 2 дугаар сарын 27-ны өдрөөс эхлэн 5-6 дахин нэмэгдээд байгаа билээ. Учир нь орон сууц санхүүжилтийн корпорациас “эд хөрөнгө өмчилж байсан эсэх архивын түүхчилсэн” лавлагаа шаардсаны улмаас ийнхүү лавлагаа авах гэсэн иргэдийн хөлд дарагдаад байгаа юм.

Эд хөрөнгийн эрхийн бүртгэлийн газрын архив өмнө нь дунджаар 60-70 лавлагааны мэдүүлгийн хуудсыг хүлээн авдаг байсан бол өнөөдрийн байдлаар өдөрт 400 гаруй иргэний мэдүүлгийг хүлээн авч байна. 3 дугаар сарын 14-ны байдлаар нийт 5600 гаруй иргэний эд хөрөнгөтэй эсэх архивын лавлагааны мэдүүлгийн хуудсыг хүлээж аваад байгаагаас 2521 иргэний лавлагааны хариуг гаргаж өгөөд байна. Улсын бүртгэлийн ерөнхий газраас оочер, дарааллийг саармагжуулах зорилгоор өдөрт 400 лавлагааны мэдүүлгийн хуудсыг тараах арга хэмжээг аваад байна. Мөн өнгөрсөн ажлын өдрөөс эхлэн хөрөнгөтэй эсэх лавлагааны мэдүүлгийн хуудсыг 2 цонхоор хүлээж авдаг байсныг болиулж эд хөрөнгийн эрхийн бүртгэлийн газрын бүхий л үйлчилгээний 20 цонхоор хүлээж авах зэрэг зохион байгуулалтын арга хэмжээг аваад байна.