Улсын Их Хурлаас 2011 оны 10 дугаар сарын 06-ны өдөр Компанийн тухай хууль/Шинэчилсэн найруулга/ болон Компанийн тухай хуулийг дагаж мөрдөх журмын тухай хуулийг батлан гаргаж, мөн оны 11 дүгээр сарын 20-ны өдрөөс эхлэн улсын хэмжээнд мөрдөгдөж байна.

Компанийн тухай хууль/Шинэчилсэн найруулга/ батлагдахаас өмнө улсын бүртгэлд бүртгүүлсэн компани дүрмээ хуульд нийцүүлэн өөрчилж, компанийн дүрэмд оруулсан өөрчлөлтийг 2012 оны 7 дугаар сарын 01-ний өдрийн дотор улсын бүртгэлд бүртгүүлэх үүрэгтэй. Мөн шинээр үүсгэн байгуулагдсан компани нь хуульд нийцсэн дүрмээ улсын бүртгүүлэх шаардлагатай юм. Шинээр байгуулагдсан болон хууль батлагдахаас өмнө улсын бүртгүүлсэн компаниуд дүрмээ хуульд нийцүүлэн улсын бүртгэлд бүртгүүлэх ажлыг шуурхай болгох, бүртгэх байгууллагаас үйлчилгээ үзүүлэх, зөвлөгөө өгөх асуудлыг хөнгөвчлөх зорилгоор нэг болон хэд хэдэн хувь нийлүүлэгч/хувьцаа эзэмшигч/-тэй компанийн дүрмийн загварыг боловсрууллаа. Улсын бүртгэлд бүртгэгдэж байгаа ихэнх компани төлөөлөн удирдах зөвлөл байхгүй байхаар бүртгүүлдэг тул дүрмийн загварт төлөөлөн удирдах зөвлөл, түүний дэргэдэх хороо, нарийн бичгийн даргатай холбоотой асуудлыг тусгаагүй болно. Компани нь төлөөлөн удирдах зөвлөлтэй байхаар компани үүсгэн байгуулах хурлаараа шийдвэрлэсэн тохиолдолд бидний боловсруулсан дүрмийн загварт нэмж тусган улсын бүртгэлд бүртгүүлэх шаардлагатай бөгөөд Компанийн тухай хууль /Шинэчилсэн найруулга/-ийн холбогдох зүйл, хэсэг, заалтуудтай нийцсэн байна. Дээрхи дүрмийн төслүүдээс гадна нэг хувь нийлүүлэгч/хувьцаа эзэмшигч/-тэй компанийн үүсгэн байгуулах шийдвэр, хэд хэдэн хувь нийлүүлэгч/хувьцаа эзэмшигч/-тэй компанийн үүсгэн байгуулах тогтоол, үүсгэн байгуулагчид мөнгөн бус хэлбэрээр компанид хувь нийлүүлсэн тохиолдолд “Компанид хувь нийлүүлсэн эд хөрөнгийн хэмжээ” маягт, эхлэлтийн тайлан тэнцлийн маягтын загварыг хамтад нь боловсруулсан болно. Компанийн үүсгэн байгуулагчид мөнгөн хэлбэрээр компанид хувь нийлүүлсэн тохиолдолд шийдвэр, тогтоолын холбогдох заалтыг хэрэглэхгүй байж болно. Энэ тохиолдолд “Компанид хувь нийлүүлсэн эд хөрөнгийн хэмжээ” маягтыг ашиглах шаардлагагүй. Нэг болон хэд хэдэн хувь нийлүүлэгч/хувьцаа эзэмшигч/-тэй Компанийн дүрмийн загвар, шийдвэр, тогтоол, маягтуудыг Улсын бүртгэлийн ерөнхий газрын вэб сайтын “загвар, маягт” цонхноос татаж авах боломжтой юм.

ХУУЛИЙН ЭТГЭЭДИЙН БҮРТГЭЛИЙН ГАЗАР