Иргэний цахим үнэмлэхийн ажлын явцын талаар Улсын бүртгэлийн ерөнхий газрын даргын үүргийг түр орлон гүйцэтгэгч Л.Амарсанаа, ХЗДХЯ-ны төрийн нарийн бичгийн дарга Г.Баясгалан нар сэтгүүлчдэд мэдээлэл хийлээ. Энэ үеэр ХЗДХЯ-ны төрийн бичгийн дарга иргэний цахим үнэмлэхийг удахгүй хэвлэж иргэдийн гарт хүргэх ажлыг богино хугацаанд эрчимтэй зохион байгуулна.
Иймээс энэхүү ажилд иргэн бүрийн идэвхи, оролцоо чухал гэдгийг онцлон хэлсэн юм. Монгол Улсын иргэний цахим үнэмлэхийг иргэний шинэчилсэн бүртгэлийн мэдээлэлд суурилан 498 бүртгэлийн анхан шатны нэгжээр дамжуулан Монгол Улсын иргэн бүрт шууд олгох юм. Иргэний цахим үнэмлэхийг хэвлэх ажил албан ёсоор 4 дүгээр сарын 6-ний өдрөөс эхлэн хуваарийн дагуу иргэдийн гарт хүрч эхлэх юм. Иргэний үнэмлэх хэвлэх үйлдвэрийн байрны засвар, тохижилтын ажил, тоног төхөөрөмж суурилуулах, програм хангамж суулгах, цахим үнэмлэх хэвлэх туршилтын ажил бүрэн дуусч, одоогийн байдлаар иргэний үнэмлэхийн бэлдэц буюу эх материал /поликорбинат/-ыг Францын “Жемальто” компанийн Финлянд дахь салбарт бэлтгэж байгаа бөгөөд эхний ээлжийн бэлдэцийг 4 дүгээр сарын эхээр татаж ирнэ. Өнгөрсөн оны 12 дугаар сард АНУ-ын Датакарт компанийн иргэний үнэмлэх хэвлэх МХ 6000ТМ маркын 2 машиныг холбогдох нууцлалын төхөөрөмж, програм хангамжийн хамт оруулж ирсэн бөгөөд нэг машин 1 иргэний үнэмлэхийг 3 секундэд хэвлэх ба өдөрт 20 цаг 2 машин зэрэг ажиллахад 48000 иргэний үнэмлэх хэвлэж байхаар нарийвчилсан хуваарийг гаргаад байна. Энэхүү бэлдэцийг ийнхүү 4 сарын 3-наас эхлэн шат дараалалтайгаар нийлүүлснээр 499 мянга 995 ширхэг хамгийн сүүлийн бэлдэцийг 6 дугаар сарын 11-нд нийлүүлэх юм. Бэлдэц Монгол Улсад иртэл 2 хоног шаарддаг тул ирсэн өдрөөс нь эхлэн үнэмлэхийг хуваарийн дагуу хэвлэнэ. Цахим үнэмлэхийг нэвтрүүлэх, хэвлүүлэхтэй холбогдуулан тоног төхөөрөмж нийлүүлж буй АНУ-ын Датакарт компанийн холбогдох мэргэжилтнүүд Монголд ирж үйлдвэрийн тоног төхөөрөмжийг угсран, серверүүдийг суурилуулж, туршилтын ажлыг мөн хийсэн байгаа. Мөн тус газраас үүнтэй холбогдуулан цахим үнэмлэхийн үйлдвэрт ажиллах мэдээлэл, технологийн мэргэжлийн инженерүүдийг гадаад улс оронд сургалтанд хамруулсан билээ. Тус газар одоогийн байдлаар ажлын процессыг нарийвчилж хэвлэх үйлдвэрийн дээд хэмжээгээр ажиллахаар ажилтнуудаа бэлдэх, иргэний шинэчилсэн бүртгэлд хамрагдсанаас хойшхи бүртгэл хийлгэсэн мэдээллийн өөрчлөлтийг цахим үнэмлэхийн мэдээлэлд эцсийн байдлаар оруулах ажлыг хийж байна. Шинэчилсэн иргэний үнэмлэх нь Монгол Улсын бүртгэл, мэдээллийн нэгдсэн тогтолцооны бүхий л салбар, түвшинг хамарч, төрийн үйлчилгээний үндсэн суурь, болох бөгөөд бүртгэлийн системийг сайжруулах, цахим засаглалын суурийг тавих, иргэний эрхийг хангахад чухал ач холбогдолтой.
