Улсын бүртгэлийн ерөнхий газрын харьяа байгууллагуудын удирдах ажилтны ээлжит зөвлөгөөн нийслэл хотноо болж өндөрлөлөө.

Энэ сарын 18-наас эхэлсэн сургалтаар иргэний цахим үнэмлэхийг олгохтой холбогдуулан уг үнэмлэхийн шинэчлэлт, олголт, түүний тухай нэгдсэн ойлголт, загвар нууцлал, тодорхойлолт хийгээд цахим үнэмлэхийн бүртгэл хөтлөлт, мэдээлэл оруулах журам зэргийн талаар дэлгэрэнгүй танилцуулга хийлээ. Мөн бүртгэлийн байгууллага өнгөрсөн онд авч хэрэгжүүлсэн ажил болоод цаашдын зорилтуудаа энэ үеэр хэлэлцэж, санал солилцсон юм. Уг зөвлөгөөнд иргэний цахим үнэмлэхийг олгох ажлын хэсгийн ахлагч нар болох аймаг, дүүргийн засаг дарга нараас гадна Улсын бүртгэлийн ерөнхий газрын төв, орон нутаг дахь улсын бүртгэлийн хэлтсийн удирдах ажилтнууд нийт 110 гаруй хүмүүс оролцлоо.