Улсын бүртгэлийн ерөнхий газарт өнөөдөр УИХ-ын Төрийн байгуулалтын байнгын хорооны гишүүд ажиллаж, иргэдэд цахим үнэмлэх олгох ажлын явцтай танилцлаа.

Тус газар нь иргэний үнэмлэхийг цахим үнэмлэхээр солих бэлтгэл ажлыг хангаад байгаа бөгөөд энэ сарын 16-наас эхлэн хэвлэж , сарын сүүлээр иргэдийн гарт хүргэхээр бэлтгэн ажиллаж байна. Монгол Улсын Засгийн газрын 2011 оны 12 дугаар сарын 28-ны өдрийн тогтоолын дагуу эхний ээлжинд иргэдэд цахим үнэмлэхийг энэ оны 6 дугаар сарын 30-ны өдрийг хүртэл иргэн бүрт нэг удаа үнэ төлбөргүй олгох юм. Иргэний цахим үнэмлэхийг ийнхүү нэвтрүүлж, иргэдэд олгосноор бүртгэл мэдээллийн нэгдсэн тогтолцооны бүхий л салбар, төвшинг хамарч, төрийн үйлчилгээний үндсэн суурь болох төдийгүй иргэний бүртгэлтэй холбоотой үнэн бодит мэдээллийн бааз, санг үүсгэх зэрэг ач холбогдолтой.