Улсын бүртгэлийн ерөнхий газар нь улсын бүртгэлийн үйл ажиллагааг төгөлдөршүүлэх, сайжруулахад чиглэсэн цогц арга хэмжээнүүдийг үе шаттайгаар авч хэрэгжүүлж байна. Энэ хүрээнд Эд хөрөнгийн эрхийн бүртгэлийг боловсронгуй болгох чиглэлээр Монголын мянганы сорилтын сангийн Хөрөнгийн эрхийн төсөлтэй хамтран ажиллаж хэд хэдэн томоохон ажлыг хийж гүйцэтгээд байгаагийн нэг нь тус газрын үйлчилгээний 1 болон 3 дугаар байрыг засварлаж, тохижуулах явдал байсан юм.

Тэгвэл өнөөдөр Улсын бүртгэлийн ерөнхий газрын үйлчилгээний 1 болон 3 дугаар байрны засварын ажил бүрэн дуусч, Монголын мянганы сорилтын сангаас түлхүүр хүлээн авах, байрны нээлтийн ёслолын арга хэмжээ боллоо . Нээлтийн ажиллагаанд Монгол улсын Тэргүүн шадар сайд Н. Алтанхуяг, Монгол Улсын сайд, ЗГХЭГ-ын дарга Ч. Хүрэлбаатар, Улсын бүртгэлийн ерөнхий газрын дарга Л. Мөнхбаатар, АНУ-с Монгол Улсад суугаа Онц бөгөөд Бүрэн эрхт элчин сайд Жонатан Эдлтон, Монголын Мянганы сорилтын сангийн Үйл ажиллагаа хариуцсан захирал Б. Отгонбат, Мянганы Сорилтын Корпорацийн Монгол дахь Суурин төлөөлөгч Роберт Рийд зэрэг хүндэт зочид төлөөлөгчид болон бусад албаны хүмүүс оролцлоо. УБЕГ-ын нэгдүгээр байр болон бусад эд хөрөнгийн бүртгэлийн албад, үйлчилгээний танхимд нийт 6,9 сая ам. долларын үнэ бүхий мэдээлэл технологийн тоног төхөөрөмж, оффисын иж бүрэн тавилга, дугаар тараах машин, үнэлгээний болон нийтэд зарлах систем зэрэг шинээр суурилагдаад байна. Улсын бүртгэлийн ерөнхий газрын харъяа Эд хөрөнгийн эрхийн бүртгэлийн газар ийнхүү засварлан, тохижуулсан үйлчилгээний байранд орсноор улсын бүртгэлийн тэр дундаа эд хөрөнгийн эрхийн бүртгэлийн үйлчилгээг иргэдэд илүү шуурхай, хүртээмжтэй хүргэх боломжийг бүрдүүлж өгөөд зогсохгүй үйл ажиллагаанд нь тулгарч байсан хүндрэл бэрхшээл тодорхой хэмжээгээр арилах юм. Дан ганц бизнесийн байгууллага ч биш төрийн үйлчилгээ иргэдэд ойр, чанартай байх боломжийг Эд хөрөнгийн эрхийн бүртгэлийн газар ийнхүү үйл ажиллагаандаа нэвтрүүлэхэд бэлэн боллоо. Монголын мянганы сорилтын сангийн Хөрөнгийн эрхийн төсөл нь гэр хорооллын иргэдэд хашааны газраа өмчлөн, хөрөнгийн эрхийн бүртгэлд бүртгүүлэхэд нь цогц дэмжлэг үзүүлэх, газар өмчлөл, бүртгэлийн үйл ажиллагааг сайжруулах зорилгоор Улаанбаатар хотын дүүргүүд болон бүсийн найман тулгуур төвүүдэд хэрэгжиж байна. Төслийн үйл ажиллагааны нэг чухал хэсэг болох Эд хөрөнгийн эрхийн бүртгэлийн үйл ажиллагааг ажлын хүрээнд төслийн зүгээс Улсын бүртгэлийн ерөнхий газрын Нэг, Гуравдугаар байр, бүсийн тулгуур найман төвүүдийн Улсын бүртгэлийн хэлтэс, Улаанбаатар хотын Чингэлтэй, Багануур дүүргийн Улсын бүртгэлийн албаны байруудын засвар шинэчлэлийн ажлыг хийж гүйцэтгэн ийнхүү хүлээлгэн өглөө.