УИХ-аас 2011 оны 10 дугаар сарын 7-ны өдөр Компанийн тухай хуулийн шинэчилсэн найруулга, Компанийн тухай хуулийг дагаж мөрдөх журмын тухай хуулийг баталсан бөгөөд уг хуулийн үзэл баримтлал, эрх зүйн зохицуулалтын талаар тус газраас Хууль зүйн үндэсний хүрээлэнтэй хамтарч хуулийн этгээдийн улсын бүртгэгч нарт зориулсан сургалтыг 12 дугаар сарын 9-ны бямба гарагт зохион байгууллаа.

Уг сургалтад ХЗДС-ийн багш Амарсанаа, ХЗДХЯ-ны Хууль зүйн бодлогын газрын ахлах мэргэжилтэн Сарангэрэл нар оролцон хичээл зааж, улсын бүртгэгч нарын сонирхсон асуултад хариулж санал солилцов. Компанийн тухай хуулийг дагаж мөрдөх журмын тухай хуульд 2011оны 10 дугаар сарын 6-ны өдөр баталсан Компанийн тухай /Шинэчилсэн найруулга/ хууль батлагдахаас өмнө улсын бүртгэлд бүртгэгдсэн компани дүрмээ мөн хуульд нийцүүлэн өөрчилж, компанийн дүрэмд оруулсан өөрчлөлтийг 2012 оны 7 дугаар сарын 01-ний өдрийн дотор улсын бүртгэлд бүртгүүлэхээр заасан. Энэхүү компанийн тухай /Шинэчилсэн найруулга/ хууль хүчин төгөлдөр болсон өдрөөс компанийн дүрмийг мөн хуульд нийцүүлэн өөрчлөх хүртэлх хугацаанд компанийн дүрэм нь Компанийн тухай /Шинэчилсэн найруулга/ хуульд заасан хэм хэмжээнд харшлаагүй хэсгээрээ хүчин төгөлдөр байх юм. Мөн компани нь Компанийн тухай /Шинэчилсэн найруулга/ хуульд нийцүүлэн дүрэмдээ оруулсан нэмэлт, өөрчлөлтийг, эсхүл компанийн дүрмийн шинэчилсэн найруулгыг бүртгүүлэхэд хураамж төлөхгүй байхаар хуульд тусгасан байна.