Төрийн албан хаагчийн ёс зүйтэй үүргээ бусдын нь л адил гүйцэтгээд амрах цаг заваар хомсхон явдаг бүртгэлийн байгууллагын ажилтнууд 11 дүгээр сарын 23-нд урлагийн Гала тоглолтоо зохион байгуулж авъяасаараа өрсөлдөн, шилдгийн шилдгүүдээ тодрууллаа.

Улсын бүртгэлийн ерөнхий газар, Нийслэлийн бүртгэлийн газар болон дүүргийн бүртгэл мэдээллийн тасгууд, орон нутгийн бүсийн тулгуур аймгууд зэрэг тус газрын харъяа 20 гаруй салбар нэгжүүд оролцож гоцлол дуу, уран уншлага, ардын язгуур урлаг, бүжиг, хөгжим гэсэн төрөл номинациудаар өрсөлдсөнөөс ерөнхий дүнгээр Хэнтий аймгийн Улсын бүртгэлийн хэлтэс тэргүүн байр буюу ''Гранпри” шагналын эздээр тодорлоо. Ховд аймгийн Улсын бүртгэлийн хэлтсийн дарга Д.Ширэндэв өөрийн зохиосон “Төрийн алтан аргамжаа” шүлгээрээ шүүгчид болоод, үзэгчдийн хүндлэлийг хүлээж чадсан бол бичиг хэргийн ажилтан Н.Найдансүрэнгийн “Даяар олныхоо төлөө болохоор Дандаа ариундаа үйлс минь Өргөн олноо гэсэн болохоор Өөдрөг явна даа бүртгэлийнхэн” гэсэн дахилтын үгтэй, хөгжмийн зохиолч, УГЗ Д.Цэвээнравдангийн аялгуу “Гэгээн үйлсийн эзэн бид” дууг Төмөр замын дуу бүжгийн чуулгын залуу дуучин Н.Дашдэмбэрэл дуулсан нь үзэгчид болоод шүүгчдийн сэтгэлийг өөрийн эрхгүй хөдөлгөж халуун алга ташилтан дор бүртгэлийнхэн байгууллагын нэрэмжит сүлд дуугаа догдлол, талархалтайгаар угтан авсан нь энэхүү тоглолтын хамгийн оргил үе байлаа. Шилдэг дууны төрлөөр Говьсүмбэр аймгийн Улсын бүртгэлийн хэлтсийн улсын бүртгэгч Б.Амарболд шалгарсан бол Хэнтийн аймгийн Улсын бүртгэлийн хэлтсийн хамт олон“Бурхадын бүжиг”-ээр, шилдэг хөгжимөөр Дундговь аймгийн Улсын бүртгэлийн хэлтсийн архивч н.Дэлгэрмөнх “икэл” морин хуурын аялгуу, уран уншлагаар Өвөрхангай аймгийн Улсын бүртгэлийн хэлтсийн хамт олон шалгарав. Харин Ардын язгуур урлагийн шилдгийн шилдгийг Баянхонгор аймгийн Улсын бүртгэлийн хэлтсийн улсын бүртгэгч уянгалаг аялгуу исгэрч үзэгчдийн таашаалыг хамгийн ихээр хүртээд авсан юм. Урлагийн бага наадмын зорилго нь Улсын бүртгэлийн байгууллагын ажилтан, албан хаагчдын чөлөөт цагийг зөв боловсон өнгөрүүлэх, тэдний авъяас чадварыг нээн хөгжүүлэх, гоо зүйн болон урлагийн мэдрэмжийг дээшлүүлэх, хамт олонч уур амьсгалыг бүрдүүлэхэд оршиж байгаа билээ. Ийнхүү цайны ч цаггүй амрах завгүй ажиллаж байдаг бүртгэлийнхэн баярынхаа өдрийг угтаж анх удаа Гала тоглолт зохион байгуулж урлагийн авъяасаараа мэргэжлийн дуучин, жүжигчин, бүжигчдээс дутахгүй гэдгээ уг наадмыг шүүсэн мэргэжлийн хүмүүст харуулж үзэгчдийг догдлуулж чадлаа. Шүүгчид энэ үеэр бүртгэлийнхнийг мэргэжлийн дуучид, бүжигчдээс огт дутахгүй байгааг хэлж, авъяаслаг албан хаагчдын цаашдын ажил, уран бүтээлд нь өндөр амжилтыг хүсэн ерөөв.