Улсын бүртгэлийн ажилтны өдрийг тохиолдуулан төр түмнийхээ төлөө зүтгэж явсан үе үеийн ахмадууд, тэдгээрийн гэр бүлийнхэн, эдүгээ энэ албанд бие сэтгэл, мэдлэг чадвараа дайчлан ажиллаж байгаа бүртгэлийн ажилтан, албан хаагчид, хамтран ажилладаг байгууллага, хамт олон Та бүхэнд чин сэтгэлийн мэндчилгээ дэвшүүлье.

Одоогоос 71 жилийн өмнө буюу 1940 оны 11 дүгээр сарын 23-ны өдөр БНМАУ-ын Ардын Сайд нарын зөвлөлийн 44 дүгээр тогтоолоор «Иргэний паспортын дүрэм»-ийг баталж, Монгол Улс өөрийн хүн амыг нас, хүйсээр нь бүртгэсэн өрхийн дэвтрийг хөтөлж эхэлснээр шинэ үеийн улсын бүртгэлийн байгууллагын тулгын чулуу тавигдсан түүхтэй. Улмаар 1992 оны шинэ Үндсэн хуулиар иргэдийн эд хөрөнгө шударгаар олж авах, эзэмших, өмчлөх, өв залгамжлах, хувийн аж ахуй эрхлэх эрх, эрх чөлөөг баталгаажуулснаар бүртгэлийн байгууллагын үйл ажиллагааны хамрах хүрээ өргөжин эдүгээ иргэний, эд хөрөнгийн, хуулийн этгээдийн бүртгэлийн чиглэлээр өргөн хүрээтэй үйл ажиллагаа явуулдаг бүртгэлийн нэгдсэн тогтолцоо бүхий Засгийн газрын хэрэгжүүлэгч агентлаг болон хөгжөөд байна. Даяарчилагдан хөгжиж байгаа өнөөгийн нийгэмд өөрийн улс орны хөгжлийг урьдчилан харсан бодлогыг хэрэгжүүлэхэд бүртгэлийн нэгдсэн систем, нэгдсэн үйл ажиллагаанд тулгуурласан бодлого нэн чухал гэж үзэн Засгийн газраас бүртгэлийг төгөлдөршүүлэх томоохон зорилтыг тавин 2008 оны 78 дугаар тогтоолоор «Монгол Улсад бүртгэл, мэдээллийн нэгдсэн тоголцоог бий болгох үндэсний хөтөлбөр»-ийг баталсан. Төр иргэнийг холбосон бүртгэлийн нэгдсэн систем, нэгдсэн үйл ажиллагаа бол Монгол Улсын хөгжлийн нэг гол түлхүүр бөгөөд төр иргэний хоорондын харилцааны шинэчлэл нь бүртгэлийн төгөлдөршил, бүртгэлийн ажилтан Та биднээс эхэлнэ. Улсын бүртгэлийн үйл ажиллагааг олон нийтэд сурталчилах зорилгоор «Улсын бүртгэлийн ажилтны өдөр»-ийг жил бүрийн 11 дүгээр сарын 23-ны өдөр тэмдэглэн өнгөрүүлэхээр Засгийн газраас шийдвэрлэсэн билээ. Улсын бүртгэлийн ажилтнууд Монгол Улсын Иргэний шинэчилсэн бүртгэлийг орон даяар зохион байгуулж, иргэн бүртээгээ нүүр тулан уулзаж, насанд хүрсэн нийт иргэнийхээ 98 хувийг бүртгэлд хамруулсан, эд хөрөнгийн болон хуулийн этгээдийн бүртгэлийн шинэчлэл хийсэн ажлын их амжилтаар «Улсын бүртгэлийн ажилтны өдөр»-өө угтаж байна. 2010-2011 он бол Монгол Улсын бүртгэл цаасанд суурилсан бүртгэлээс цахим бүртгэл, мэдээлэлд шилжих суурийг тавьсан нөр их хөдөлмөр, хичээл зүтгэлийн жил байлаа . Цаашид иргэнд суурилсан төрийн бүртгэлийн үнэн бодитой ой санамжийг бий болгох, төрийн бүртгэлийн үйлчилгээгээр иргэний эрхийг хангах явдлыг эрхэм зорилгоо болгон бүртгэлийн бодлогын нэгдмэл чанарыг хангах, үндэсний аюулгүй байдлыг бэхжүүлэх, улс орны эдиыйн засгийн өсөлтөд дэмжлэг үзүүлэх, бүртгэлийн үйл ажиллагааг төгөлдөршүүлэх, төрийн үйлчилгээг хүртээмжтэй шуурхай болгоход манай байгууллагын үйл ажиллагаа чиглэж байна. Улсын бүртгэлийн ажилтан Та бидний өмнө ойрын хугацаанд Монгол Улсын иргэний үнэмлэхийг шинэчлэн Монгол Улсын иргэнд олгох томоохон бөгөөд хариуцлагатай үүрэг ноогдож байгаа бөгөөд бид хамтдаа биелүүлж чадна гэдэгт миний бие итгэл дүүрэн байна. «Улсын бүртгэлийн ажилтны өдөр»-ийг тохиолдуулан Та бүхэнд эрүүл энх, аз жаргал, хамгийн сайн сайхан бүхнийг хүсэн ерөөе. Төр иргэний нандин хэлхээ батжин бэхжих болтугай.

УЛСЫН БҮРТГЭЛИЙН ЕРӨНХИЙ ГАЗРЫН ДАРГА Л.МӨНХБААТАР