Улсын бүртгэлийн ерөнхий газар «Улсын бүртгэлийн ажилтны өдөр»-ийг 11 дүгээр сарын 23-ны өдөр 2 дахь жилдээ тэмдэглэн өнгөрүүлж байна. Энэ өдрийн хүрээнд өнөөдөр тус газар Монголын Мянганы сорилтын сантай хамтран Хөрөнгийн эрхийн төслийг хэрэгжүүлэх ажлын хүрээнд Багануур дүүргийн Засаг даргын тамгын газрын өмнөх талбайд Улсын бүртгэлийн хэлтсийн шинэ байрны нээлт, тууз хайчлах ёслолын ажиллагаа боллоо.

Нээлтийн ажиллагаанд Улсын бүртгэлийн ерөнхий газрын Дарга Л.Мөнхбаатар тэргүүтэй удирдлагууд, Багануур дүүргийн Засаг дарга Ц.Сандаг-Очир, Мянганы сорилтын корпорацийн Суурин төлөөлөгч Роберт И.Рийд, Монголын Мянганы сорилтын сангийн Гүйцэтгэх захирал С.Баярбаатар зэрэг зочид төлөөлөгчид оролцов. Өмнө нь Багануур дүүргийн Улсын бүртгэлийн тасаг нь иргэдэд зөвхөн иргэний бүртгэлийн үйлчилгээг хүргэдэг байсан бол ийнхүү Улсын бүртгэлийн алба болон өргөжиж иргэний, эд хөрөнгийн, хуулийн этгээдийн гээд бүртгэлийн бүхий л төрлийн үйлчилгээг иргэдэд нэг дор хүргэх боломжтой болж байна. Эд хөрөнгийн эрхийн бүртгэлийн мэдээллийн технологи, бүртгэлийн байруудын орчин нөхцөлийг сайжруулах хүрээнд Улсын Бүртгэлийн Ерөнхий Газрын 1 ба 3 дугаар байр, бүсийн тулгуур төвүүдийн Улсын бүртгэлийн хэлтсийн байруудыг шинэчлэн засварлаж, зарим байруудыг улсын комисст хүлээлгэн өгөөд байгаа билээ.