Өнөөдөр Хууль зүйн үндэсний хүрээлэнгийн хурлын танхимд “Бүртгэлийн ажилтан”-ы өдрийг энэ сарын 23-ны өдөр тэмдэглэх ажлын хүрээнд “Улсын бүртгэлийн өнөөгийн байдал, цаашдын чиг хандлага ” сэдэвт Эрдэм шинжилгээний бага хурал болж өндөрлөв.

Тус хурлыг Монгол Улсын Их сургуулийн ХЗДС-ийн Иргэний эрх зүйн тэнхим, Хууль зүйн үндэсний хүрээлэнтэй хамтран зохион байгуулсан бөгөөд Монгол Улсын Бүртгэлийн байгууллагын үйл ажиллагааны өнөөгийн байдал, цаашдын зорилт чиг хандлага, холбогдох эрх зүйн зохицуулалтыг боловсронгуй болгох, өнгөрсөн болон өнөөгийн тvвшинг хэлэлцэж, санал солилцох зорилготой билээ. Хурлыг тус газрын дарга Л.Мөнхбаатар оролцон нээж үг хэлсэн юм. Бага хуралд тус газрын орлогч болон холбогдох газрын дарга нар, Авлигатай тэмцэх газрын Судалгаа шинжилгээний албаны дарга Б.Батзориг, МУИС-ийн Хууль зүйн сургуулийн Иргэний эрх зүйн тэнхимийн багш, докторант Д.Янжинхорол, Удирдлагын академийн зөвлөх, Профессорын багийн гишүүн, доктор, профессор Д.Сэржамц, Отгонтэнгэр дээд сургууль зэрэг байгууллагын эрдэмтэн, доктор профессорууд оролцон Монгол Улсын бүртгэлийн байгууллагын үйл ажиллагаа, өнөөгийн тогтолцоо болон цаашдын зорилт, хууль, эрх зүйн орчинг боловсронгуй болгох арга замын талаар 10 гаруй илтгэл тавьж, хэлэлцэв. Тухайлбал Иргэний болон Эд хөрөнгийн бүртгэлийн системийн өнөөгийн байдал, цаашдын чиг хандлага хийгээд газрын бүртгэлийн системд тулгамдаж буй зарим асуудал, хөдлөх эд хөрөнгийн барьцааны бүртгэл нь эдийн засгийн эргэлтийг дэмжих үндэслэл болох эсэх, үл хөдлөх эд хөрөнгийн зах зээлийн харилцаа, эдийн засгийн эргэлтэд орох нь, улсын бүртгэлийн байгууллагын шударга байдлын түвшинг үнэлэх судалгааны үр дүн зэрэг сэдвийн хүрээнд явагдаж, улсын бүртгэлийн өнөөгийн болон цаашдын төлөв байдал зэрэг тулгамдаж буй өргөн сэдвийн хүрээнд явагдаж өндөрлөлөө. Улсын бүртгэлийн өнөөгийн байдал, цаашдын чиг хандлага сэдэвт уг семинарт дээрх илтгэгч нараас гадна төв, аймаг, нийслэлийн Улсын бүртгэлийн хэлтсийн удирдлагууд болон бусад албаны 70 гаруй хүн оролцов.