Засгийн газрын хэрэгжүүлэгч агентлаг Улсын бүртгэлийн ерөнхий газар, Оросын холбооны Улсын Хууль зүйн яамны дэргэдэх Улсын бүртгэлийн газар нар хамтын ажиллагааг бэхжүүлэх, харилцан сонирхосон асуудлаар мэдээлэл, туршлага солилцох зорилгоор 2010 оны 12 дугаар сарын 14-ний өдөр ОХУ-ын Москва хотноо хамтын ажиллагааны хэлэлцээрт гарын үсэг зурсан билээ.

Хэлэлцээрийн хүрээнд “2011-2012 оны хамтын ажиллагааны хөтөлбөр” хамтран боловсруулж амжиллтай баталсан ба энэхүү хөтөлбөрийн дагуу тус газрын дарга Л.Мөнхбаатар тэргүүтэй төлөөлөгчид Оросын холбооны Улсын Хууль зүйн яамны дэргэдэх Улсын бүртгэлийн газарт ажлын айлчлал хийлээ. Энэ удаагийн айлчлалаар Оросын холбооны Улсын Хууль зүйн яамны дэргэдэх Улсын бүртгэлийн газрын үйл ажиллагаатай дэлгэрэнгүй танилцах, туршлага судлах, хамтын ажиллагааг бэхжүүлэх уулзалт хийсэн ба ОХУ-ын бүртгэлийн байгууллага нь мэдээллийн сангаа сүлжээнд холбож, онлайн үйлчилгээ болон цахим гарын үсэг ашиглаж байгаа нь харилцан туршлага солилцох нэг чиглэл болов. Түүнчлэн тус хоёр байгууллагаас гадна ОХУ-ын Татварын алба, ОХУ-ын Шилжилт хөдөлгөөний алба, Монгол Улсаас Оросын Холбооны Улсад суугаа Элчин сайдын яам, Монголын Үндэсний худалдаа, аж үйлдвэрийн танхим, Монголын бизнес эрхлэгчдийн төлөөллийг оролцуулсан дугуй ширээний уулзалт хамтран зохион байгуулсан ба Монголын бизнес эрхлэгчид сонирхсон асуултаа асуун тулгамдаж буй асуудлаа хэлэлцсэн үр дүнтэй уулзалт болж өндөрлөв.