УБЕГ, ОХУ-ын Хууль зүйн яамны дэргэдэх Улсын бүртгэлийн танхимын хооронд 2010 оны 12 дугаар сард «Харилцан ойлголцлын санамж бичиг» байгуулж, бүртгэлийн үйл ажиллагааны чиглэлээр харилцан дэмжлэг үзүүлэх, харилцан мэдээлэл солилцож ажиллахаар тохиролцсон.

ОХУ-ын Хууль зүйн яамны дэргэдэх Улсын бүртгэлийн танхимын үйл ажиллагаатай танилцах, тус байгууллагатай тогтоосон хамтын ажиллагааг цаашид өргөжүүлэн хөгжүүлэх, ОХУ-д үйл ажиллагаа явуулж байгаа Монгол Улсын аж ахуйн нэгж, компаниудад бүртгэл, зөвшөөрлийн асуудлаар дэмжлэг үзүүлэх зорилгоор УБЕГ-ын дарга Л.Мөнхбаатар, Тамгын газрын дарга Б.Баатарсайхан, Хуулийн этгээдийн бүртгэлийн газрын дарга Б.Нямдулам, Сургалт сурталчилгааны төвийн гадаад харилцааны мэргэжилтэн Б.Батчимэг нар ОХУ-ын нийслэл Москва хотноо энэ сарын 12-14-ны өдрүүдэд ажиллаа. «ОХУ-ын Хууль зүйн яамны дэргэдэх Улсын бүртгэлийн танхимын чиг үүрэг, бодлого , үйлчилгээний хүрээ, ОХУ-ын нутаг дэвсгэр дээр гадаадын хөрөнгө оруулалттай компани, төлөөлөгчийн газрын бизнес эрхлэх нөхцөл, тэдэнд үзүүлэх визийн дэмжлэг» сэдэвт дугуй ширээний уулзалтад УБЕГ болон ОХУ-ын Хууль зүйн яамны дэргэдэх Улсын бүртгэлийн газрын удирдлагуудаас гадна Монгол Улсаас ОХУ-д суугаа Элчин сайдын яамны Консулын хэлтэс, Монголын Үндэсний Худалдаа, аж үйлдвэрийн танхим, МИАТ, “Эрдэнэт ГОК”-ийн Төлөөлөгчийн газар, “Монгол Росцветмет” компанийн төлөөлөгчийн газар, Улаанбаатар төмөр зам ХК-ийн суурин төлөөлөгч нар оролцож өөрсдийн үйл ажиллагаанд бүртгэл, визаны чиглэлээр учирч байгаа хүндрэл бэрхшээлийн талаар дэлгэрэнгүй танилцуулав. ОХУ-ын Хууль зүйн яамны дэргэдэх Бүртгэлийн танхимын орлогч дарга В.С. Воровьев, Зөвшөөрөл, визны асуудлын газрын орлогч дарга В.Ф. Кириленко нар Монголын бизнес эрхлэгчдэд бүртгэлийн зөвшөөрөл, визаны хөнгөлөлт үзүүлж, дэмжиж ажиллахаа мэдэгдээд уулзалтын үеэр гарсан тодорхой асуудлуудыг газар дээр нь судалж, шийдвэрлэн ажиллав. УБЕГ, ОХУ-ын Хууль зүйн яамны дэргэдэх Улсын бүртгэлийн танхимын удирдлагын хооронд болсон уулзалт ярилцлага ажил хэрэгч, элэгсэг дотно уур амьсгалд болж, амжилттай өндөрлөв.