Зуунмод хот - Монголын Мянганы сорилтын сангийн Хөрөнгийн эрхийн төслийн хүрээнд засварласан Төв аймгийн Улсын бүртгэлийн хэлтсийн байрны нээлтийн үйл ажиллагааг 2011 оны 10 сарын 12-ны өдөр 16.00 цагт тус байрны өмнөх талбайд зохион байгууллаа.

Ёслолын ажиллагаанд Төв аймгийн Засаг даргын орлогч П.Цэрэн, Улсын бүртгэлийн ерөнхий газрын Орлогч дарга С.Энхбаатар тэргүүтэй удирдлагууд, Америкийн нэгдсэн улсаас Монгол улсад суугаа Онц бөгөөд бүрэн эрхт Элчид сайд Жонатан Эдлтон, Мянганы сорилтын корпорацийн Тэргүүн Дэд ерөнхийлөгч Томас Херли, Мянганы сорилтын корпорацийн Суурин төлөөлөгч Роберт Рийд, Монголын Мянганы сорилтын сангийн Гүйцэтгэх захирал С.Баярбаатар зэрэг зочид төлөөлөгчид оролцлоо. Эд хөрөнгийн эрхийн бүртгэлийн мэдээллийн технологи,бүртгэлийн байруудын орчин нөхцөлийг сайжруулах хүрээнд төслийн зүгээс Улсын Бүртгэлийн Ерөнхий Газрын 1 ба 3 дугаар байр, төсөл хэрэгжиж буй бүсийн найман тулгуур төвүүдийн Улсын бүртгэлийн хэлтсийн байруудыг шинэчлэн засварлаж, зарим байруудыг улсын комисст хүлээлгэн өгөөд байна. Цаашид эдгээр байруудад тавилга, мэдээллийн технологийн тоног төхөөрөмж, холбогдох програм хангамжийг нийлүүлэх бөгөөд ингэснээр иргэд нэг дороос иргэний, эд хөрөнгийн, хуулийн этгээдийн бүртгэлийн үйлчилгээг түргэн шуурхай авах боломж бүрдэх юм. Барилгын засварын ажилд “Байгаль орчны болон Барилгын хортой болон аюултай хог хаягдлын менежментийн төлөвлөгөө”-г хэрэгжүүлэн ажилласан нь манай улсын барилгын салбарт шинэлэг ажил боллоо. Хөрөнгийн эрхийн төсөл нь гэр хорооллын иргэдэд хашааны газраа өмчлөх, хөрөнгийн эрхийн бүртгэлд бүртгүүлэхэд цогц дэмжлэг үзүүлэх зорилгоор Улаанбаатар хотын дүүргүүд болон бүсийн найман тулгуур төвүүдэд (Ховд, Улиастай, Арвайхээр, Дархан, Эрдэнэт, Зуунмод, Өндөрхаан, Чойбалсан) хэрэгжиж байна.