Жижиг, дунд үйлдвэр эрхлэгч аж ахуйн нэгжийг бүртгэнэ

Жижиг, дунд үйлдвэрийг дэмжих төрийн бодлогын хүрээнд жижиг, дунд үйлдвэр эрхлэх таатай нөхцлийг бүрдүүлэх, тэдгээрийг санхүүгийн талаар дэмжих, хөрөнгийн хангалттай байдлыг сайжруулах зорилгыг хангах, Жижиг дунд үйлдвэрийн тухай хуулийг хэрэгжүүлэх зорилгоор тус газрын Хуулийн этгээдийн бүртгэлийн газарт жижиг, дунд үйлдвэр эрхлэгч аж ахуйн нэгжийг бүртгэх бэлтгэл ажлыг хангаж байна.

Жижиг, дунд үйлдвэрийн тухай хуулийн 6.1 дэх хэсэгт « Энэ хуулийн 5.1-д заасан шаардлагыг хангасан аж ахуйн нэгж, иргэн нь жижиг, дунд үйлдвэр эрхлэгчийн бүртгэлд бүртгүүлэх хүсэлтээ Хуулийн этгээдийн улсын бүртгэлийн тухай хуулийн 7.1.1-д заасан байгууллага /цаашид “бүртгэх байгууллага” гэх/-д гаргана» гэж заасны дагуу жижиг, дунд үйлдвэр эрхлэгч аж ахуйн нэгжийг 2011 оны 10 дугаар сарын 1-ны өдрөөс эхлэн Улаанбаатар хотод УБЕГ-ын Хуулийн этгээдийн бүртгэлийн газар, аймгийн Улсын бүртгэлийн хэлтсүүдэд бүртгэж эхэлнэ.

Жижиг, дунд үйлдвэр эрхлэгч аж ахуйн нэгжид хамаарах этгээд:

Жижиг, дунд үйлдвэрийн тухай хуулийн 5 дугаар зүйлд заасны дагуу жижиг, дунд үйлдвэр эрхлэгч гэдэгт дараахь шаардлагыг хангасан, Жижиг, дунд үйлдвэрийн тухай  хуулийн 6.6-д заасны дагуу бүртгүүлсэн аж ахуйн нэгжийг ойлгоно. Үүнд:

1. контракт, хөдөлмөрийн гэрээгээр ажиллагчдын тоо нь 199-өөс дээшгүй бөгөөд 1.5 тэрбум төгрөг хүртэлх жилийн борлуулалтын орлого бүхий үйлдвэрлэл эрхэлдэг аж ахуйн нэгж

2. контракт, хөдөлмөрийн гэрээгээр ажиллагчдын тоо нь 149-өөс дээшгүй бөгөөд 1.5 тэрбум төгрөг хүртэлх жилийн борлуулалтын орлого бүхий бөөний худалдаа эрхэлдэг аж ахуйн нэгж;

3. контракт, хөдөлмөрийн гэрээгээр ажиллагчдын тоо нь 199-өөс дээшгүй бөгөөд 1.5 тэрбум төгрөг хүртэлх жилийн борлуулалтын орлого бүхий жижиглэнгийн худалдаа эрхэлдэг аж ахуйн нэгж;

4. контракт, хөдөлмөрийн гэрээгээр ажиллагчдын тоо нь 49-өөс дээшгүй бөгөөд 1 тэрбум төгрөг хүртэлх жилийн борлуулалтын орлого бүхий үйлчилгээ эрхэлдэг аж ахуйн нэгж;

5. контракт, хөдөлмөрийн гэрээгээр ажиллагчдын тоо нь 19-өөс дээшгүй бөгөөд үйлдвэрлэл эрхэлдэг, эсхүл контракт, хөдөлмөрийн гэрээгээр ажиллагчдын тоо нь  9-өөс дээшгүй бөгөөд худалдаа, үйлчилгээ эрхэлдэг, 250 сая төгрөг хүртэлх жилийн борлуулалтын орлого бүхий жижиг үйлдвэр эрхлэгч аж ахуйн нэгж

Жижиг, дунд үйлдвэр эрхлэгч аж ахуйн нэгжийн хэлбэр:

Жижиг, дунд үйлдвэрийн тухай хуулийн 5.2 дахь хэсэгт заасны дагуу жижиг, дунд үйлдвэр эрхлэгч аж ахуйн нэгж нь компани, хоршоо, нөхөрлөл гэсэн хэлбэртэй байх бөгөөд жижиг, дунд үйлдвэр эрхлэгчийн хуульд  заасан шаардлагыг хангаж буй эсэхийг тогтоохдоо тухайн хуулийн этгээдийн салбар, төлөөлөгчийн газар, хараат болон охин компанийн холбогдох үзүүлэлтийг оруулж тооцно. /Жижиг, дунд үйлдвэрийн тухай хуулийн 5.2 дахь хэсэг/

Жижиг, дунд үйлдвэр эрхлэгчийн бүртгэл, тэмдэглэл

Жижиг дунд үйлдвэр эрхлэгч аж ахуйн нэгжээр бүртгүүлэхдээ УБЕГ-ын даргын 2010 оны  368 дугаар р тушаалаар батлагдсан «Жижиг, дунд үйлдвэр эрхлэгчээр бүртгүүлэх өргөдлийн маягт»-ыг бүрэн гүйцэд, үнэн зөв бөглөн бүртгэлийн байгууллагад гаргана. Өргөдөлд: /Жижиг, дунд үйлдвэрийн тухай хуулийн 6.2 дахь хэсэг/

1. хүсэлт гаргагч иргэний овог, нэр, оршин суугаа газрын хаяг;

2. хүсэлт гаргагч аж ахуйн нэгжийн оноосон нэр, оршин байгаа газрын хаяг;

3. эрхэлж байгаа үйл ажиллагааны төрөл;

4. контракт, хөдөлмөрийн гэрээгээр ажиллагчдын тоо, жилийн борлуулалтын орлогын тухай мэдээллийг тусгана.

Жижиг, дунд үйлдвэр эрхлэгч аж ахуйн нэгжээр бүртгүүлэх өргөдөлд дараахь баримт  бичгийг  хавсаргана. Үүнд: /Жижиг, дунд үйлдвэрийн тухай хуулийн 6.4 дэх хэсэг/

1.  улсын бүртгэлийн гэрчилгээ;

2. контракт, хөдөлмөрийн гэрээгээр ажиллагчдыг нийгмийн даатгалд хамруулсан тухай нийгмийн даатгалын байгууллагын тодорхойлолт;

3.  улсын тэмдэгтийн хураамж төлсөн баримт; /2200 төгрөг/

4. аудитын байгууллагаар баталгаажуулсан өмнөх жилийн санхүүгийн болон татварын тайлан баланс.

Бүртгэх хугацаа

Хуулийн этгээдийн улсын бүртгэгч аж ахуйн нэгжийн хүсэлтийг хүлээн авч, хуульд  заасан шаардлагыг хангасан гэж үзвэл бүртгэх байгууллага хүсэлтийг хүлээн авснаас хойш ажлын 7 өдрийн дотор жижиг, дунд үйлдвэр эрхлэгчийн бүртгэлд бүртгэж, дараахь ажиллагааг хийнэ: /Жижиг, дунд үйлдвэрийн тухай хуулийн 6.6  дахь хэсэг/

1. аж ахуйн нэгжийн улсын бүртгэлийн гэрчилгээнд тэмдэглэл хийх;

2. хуулийн этгээдийн бүртгэлийн мэдээллийн санд холбогдох мэдээллийг оруулах

3. хуулийн этгээдийн хувийн хэрэгт холбогдох материалыг хийх

Жижиг, дунд үйлдвэр эрхлэгч аж ахуйн нэгжээр бүртгэхээс татгалзах үндэслэл

Хүсэлт гаргагч Жижиг, дунд үйлдвэрийн тухай  хуулийн 5.1 дэх хэсэгт  заасан шаардлагыг хангаагүй, эсхүл бичиг баримтын бүрдэл дутуу байвал улсын бүртгэгч  зохих үндэслэлийг зааж бүртгэхээс татгалзсан хариуг хүсэлтийг хүлээн авсанаас хойш ажлын 7 өдрийн дотор бичгээр мэдэгдэнэ. /Жижиг, дунд үйлдвэрийн тухай хуулийн 6.8 дахь хэсэг/

Жижиг, дунд үйлдвэр эрхлэгчийг бүртгэлээс хасах

Бүртгэх байгууллага дор дурдсан үндэслэлээр жижиг, дунд үйлдвэр эрхлэгчийг бүртгэлээс хасч, хуулийн этгээдийн улсын бүртгэлийн гэрчилгээнд хийсэн  тэмдэглэлийг хүчингүй болгох тухай шийдвэр гаргана: /Жижиг, дунд үйлдвэрийн тухай хуулийн 7 дугаар зүйл/

1. Жижиг, дунд үйлдвэрийн тухай  хуулийн 5.1-д заасан шаардлагыг хангахгүй болсон;

2.  жижиг, дунд үйлдвэр эрхлэгч бүртгэлээс хасуулах тухай хүсэлт гаргасан;

3.  бүртгүүлэхдээ хуурамч бичиг баримт бүрдүүлсэн нь тогтоогдсон;

4. аж ахуйн нэгж татан буугдсан;

5.жижиг, дунд  үйлдвэр эрхлэгч нь байгаль орчин ба хүний эрүүл мэндэд хортой технологи, материал хэрэглэсэн, экологийн хохирол учруулсан нь тогтоогдсон.

Жижиг, дунд үйлдвэр эрхлэгчид хамаарахгүй этгээд /Жижиг, дунд үйлдвэрийн тухай хуулийн 7 дугаар зүйл/

Дараахь төрлийн үйл ажиллагаа эрхэлдэг аж ахуйн нэгж, иргэн жижиг, дунд үйлдвэр эрхлэгчид хамаарахгүй. Үүнд:

1. тамхи, согтууруулах ундааны үйлдвэрлэл;

2. төлбөрт таавар, бооцоот тоглоом, эд мөнгөний хонжворт сугалаа;

3. банк, банк бус санхүүгийн үйл ажиллагаа, даатгалын үйлчилгээ;

4. ашигт малтмал эрэх, хайх, ашиглах.

 

ХУУЛИЙН ЭТГЭЭДИЙН БҮРТГЭЛИЙН ГАЗАР

Please publish modules in offcanvas position.