Тус газрын Хуулийн этгээдийн бүртгэлийн газраас аймгийн Улсын бүртгэлийн хэлтсийн хуулийн этгээдийн улсын бүртгэгч нарын сургалт энэ оны 6 дугаар сарын 2-ноос 4-ны өдрүүдэд Улаанбаатар хотноо амжилттай явагдаж өндөрлөлөө.

Улсын хэмжээнд төрийн бус байгууллага, үйлдвэрчний эвлэлийн байгууллага, сан, шашны байгууллага, хэвлэл мэдээллийн хэрэгслийг Улаанбаатар хотод Хуулийн этгээдийн бүртгэлийн газарт бүртгэдэг байсныг өөрчилж улсын бүртгэлийн үйлчилгээг иргэдэд түргэн шуурхай үзүүлэх, иргэдэд учирч байгаа бэрхшээлийг багасгах, төвлөрлийг сааруулах зорилгоор аймгийн Улсын бүртгэлийн хэлтсүүдэд дээрх хуулийн этгээдийн бүртгэлийг шат дараатай бүртгэж эхлэхээр төлөвлөн ажиллаж эхлээд байгаа билээ. Дээрх арга хэмжээтэй холбогдуулан 7 дугаар сарын 1-ний өдрөөс эхлэн эхний ээлжинд төрийн бус байгууллага, үйлдвэрчний эвлэлийн байгууллагыг аймгийн Улсын бүртгэлийн хэлтсүүдэд бүртгэж эхлэх юм. Тэгвэл үүний дагуу энэхүү сургалтаар Хуулийн этгээдийн бүртгэлийн хууль тогтоомж, эрх зүйн зохицуулалт, төрийн албан хаагчийн ёс зүй, авлигаас урьдчилан сэргийлэх арга, төрийн бус байгууллага, үйлдвэрчний эвлэлийн байгууллагыг улсын бүртгэлд бүртгэхэд анхаарах асуудлууд зэрэг сэдвийн хүрээнд явагдаж улсын бүртгэгч нарыг дадлагажуулан улмаар практик дадлагыг олгож байгаагаараа энэ удаагийн сургалт ихээхэн ач холбогдолтой боллоо. Мөн энэ үеэр дээрх бүртгэлтэй холбогдуулан орон нутагт үйл ажиллагаа явуулдаг 2009 оны 3 дугаар сараас хойш байгуулагдсан 732 төрийн бус байгууллага, үйлвэрчний эвлэлийн байгууллагын хувийн хэргийг тухайн аймгийн УБХ-дэд хүлээлгэн өгөх ажил хийгдсэн юм. Хуулийн этгээдийн улсын бүртгэгч нарыг дадлагажуулах сургалтад аймгийн Улсын бүртгэлийн хэлтсийн хуулийн этгээдийн бүртгэл хариуцсан нийт 22 улсын бүртгэгч оролцлоо.